VOV4.Bahnar - Kơ yuơ đei ƀơm đơ̆ng jĭ hơbŭh Covid-19, bơ̆ jang tĕch mơdro tơmam drăm tơ̆ tĕh đak đe lơ̆m khei 7 tŏk bŏk păh ai dơ̆ng. Akŏp tĕch mơdro tơmam drăm tơ̆ tĕh đak đe lơ̆m khei 7 au ki dang 55 ti 700 trĭu  USD, lăp tŏk 1,5% pơtêng hăm khei hơdrol. Mă lei, jô̆ atŭm 7 khei sơnăm 2021, akŏp tĕch mơdro tơmam drăm tơ̆ tĕh đak đe iŏk đei lơ (tŏk 30,2% pơtêng hăm khei au sơnăm sơ̆). Mĭnh lơ̆m rim trong jang đei Dơnŏ anĭh tơm vei lăng Mơdro sa pơma hơdăh dôm khei vă đĭ sơnăm ‘nŏh atŏk kơtang tĕch mơdro tơ̆ tĕh đak, ư̆h gan răt tơmơ̆t, pơgơ̆r năm tơchă, pơgĕnh iŏk dôm tơdrong rơvơn đơ̆ng rim FTA vă tơchă trong atŏk tơ iung hơnĭh tĕch mơdro păng hơmet pơ ‘lơ̆ng dur găn ga vă năm tĕch mơdro tơ̆ rim hơnĭh hle. Hơmet pơ ‘lơ̆ng păng pơ̆ih să hơnĭh tĕch mơdro, tơgĕch iŏk kơtang đơ̆ng rim Tơdrong tơchơ̆t mơdro sa hiôk hian (FTA) hlôi đei jang kiơ̆; tơlĕch lơ trong jang tĕch mơdro tơ tĕh đak đe, răt tơmơ̆t đơ̆ng tĕh đak đe.

Tơblơ̆ nơ̆r: Amazưt