VOV4.Bahnar  – Hăm tơdrong 'meh vang glơng dôm tơdrong tơnap tap, atŭm hăm noh hơ 'nhăk tơdrong chơt hơ iă ăn đe hơ ioh iĕ tơ̆ dôm tơring ataih yaih tơ̆ xăh Đăk Pne, Anih jang unh hơyuh Kon Braih, anih jang unh hơyuh Kon Tum năm apong păng axong tơmam ăn đe hơ ioh iĕ tơ̆ minh ƀar pơlei tơnap tap hloh, ataih hloh ƀơ̆t 'Năr apŭng plenh teh kơ đe hơ ioh năr 1/6.  Xăh Đăk Pne jing xăh hin dơnuh, ataih yaih tơnap tap hloh kơ apŭng Kon Braih, dêh char Kon Tum hăm hloh 75% unh hnam kon pơlei bơngai Bahnar, tơdrong erih kon pơlei tơ̆ âu ƀơm lơ tơnap tap hloh. Kang ƀô̆ bơngai jang kơ Anih Unh hơyuh Kon Braih hlôi kơdih hơvơn păng pơjao 25 tơpu tơmam ăn đe hơ ioh; axong tơmam ăn 5 'nu hơ ioh đei tơdrong erih tơnap tap hŏk pơhrăm rơgei tơ̆ pơlei Đăk Nghen; axong tơmam atŭm hăm kơsô̆ jên 300.000 hlj vă tơgŭm ăn oh A Nguy tơ̆ pơlei Đăk Po, thôn 2, xăh Đăk Pne hơven hơvo đơ̆ng oei 'lâ̆p.

Lan chih păng pơre nơ̆r