VOV4.Bahnar - Tơ̆ anih tơm Paris (Phalăng), Anih jang gre păr Bamboo Airways păng Grŭp jang Safran pơ gơ̆r kĭ pơ kăp hla ar chih tơ băt jang hơ doi hăm tơ drong dơ̆ng lăng đơ̆ng Thủ tướng Việt Nam Phạm Minh Chính păng Thủ tướng Phalăng Jean Castex. Tơ drong ‘nâu đei lơ̆m ‘măng năm hơ pong tơ̆ Cộng hòa Phalăng đơ̆ng ‘năr 3 – 5/11 kơ Thủ tướng Phạm Minh Chính.

Thủ tướng Việt Nam păng Phalăng vang pơm lêh kĭ pơ kăp drơ̆ng nơ̆r jang hơ doi đei kơ jă 2 ti Euro đơ̆ng Bamboo Airways hăm Safran

Tơ̆ âu, Anih jang gre păr Bamboo Airways păng Safran – Grŭp jang tih lơ̆m apŭng plenh tĕh găh ki thuơ̆t gre păr – pơ gơ̆r kĭ pơ kăp Hla ar tơ băt jang hơ doi găh tơ drong chă rơih kơ măy păng tơ mam kơ măy kơ mŏk gre păr hăm hla ar apinh răt 50 tŏ gre păr A321NEO păng 30 tŏ gre păr Boeing 787-9 đơ̆ng Bamboo Airways. Akŏm đĭ đăng kơ jă jên đei chih lơ̆m hla ar kĭ pơ kăp jang hơ doi truh 2 ti Euro. 

Pơ jing đei trong jang hơ doi đunh đai hăm Việt Nam đơ̆ng sơ năm 2013, truh dang ei Phalăng păng Việt Nam đei tơ drong pơ vei tôch kơ jăp, vang jang tŏk hơ doi găh lơ tơ drong. Lơ̆m tơ drong jang gre păr chơ tơ moi, Việt Nam – Phalăng đei tơ drong pơ vei đơ̆ng sơ̆, tôch rơ đăh. Anih jang gre păr Việt Nam păng Anih jang gre păr Phalăng hlôi kĭ pơ kăp jang hơ doi găh ki thuơ̆t. 

Dơ̆ng: Tơ blơ̆