VOV4.Bahnar - ‘Năr 18/5, Thủ tướng Phạm Minh Chính bơ̆ jang hăm Anih tơm vei lăng ming man găh tơ drong jang tơ̆ anih âu, dôm tơ drong jang tam mă kĕh, tơ drong kăl đei sek tơ lang, dôm tơ drong jang gĭt kăl đunh đai, dôm nơ̆r pơ ma apĭnh đơ̆ng anih âu.

Bơ̆ jang hăm Anih tơm vei lăng ming man, Thủ tướng Phạm Minh Chính tơ ƀôh lơ trong jang vă atŏk tơ iung anih jang tơ̆ hơ năp kơnh, nhen atŏk tơ iung hnam, tĕh athei hơ tŏ ‘lơ̆ng păng rơ gei ăn tơ pôl; hơ tŏk tơ ring kơ drâm jing 1 anih jang mŭk drăm gĭt kăl; năng kăl păng tơ mât jên jang mă tơ găl ăn tơ drong chĕng hơ met, tơ proh trong jang; pơ jing trong sơng iŏk jên jang, Thủ tướng pơ ma hơ dăh, ‘sơng đei 1 hlak jên jang đơ̆ng anih jang kơ dih ‘nŏh kŭm tôch kăp gĭt bơih’.

Tơ roi ăn Thủ tướng, Kơ dră tơm vei lăng tơ drong ming man Nguyễn Thanh Nghị pơ ma hơ dăh dôm tơ drong jang đei mư̆h bơ̆ jang vei lăng. Lơ̆m jăl jang đơ̆ng 2016-2020, Anih tơm kơ chăng hơ len năng, hŭt lê̆ 1,2 tơ drong hơ găt hơ drom băl, tơ drong tơ jră băl lơ̆m dôm hla ar chih luơ̆t, hơ tŏk tơ drong hơ met ming hla ar vei lăng. Anih tơm akŏm jơ hngâm bơ̆ jang atŏk tơ iung hnam oei kơ tĕh đak, truh sơ năm 2020, lơ̆m tĕh đak hlôi păng oei tơ lĕch jang dang 5.000 tơ drong jang man hnam oei, tơ ring kơ drâm ‘nao (tŏk vă jê̆ 3 ‘măng pơ têng hăm sơ năm 2010). Tơ drong tĕch mơ dro tĕh, hnam oei tam ƀôh tơ drong ưh ‘lơ̆ng tih kiơ.

Dơ̆ng: Tơ blơ̆