VOV4.Bahnar - Kơ sơ̆ 23/3, tơ̆ Anĭh jang kơ Khul kơ dră tĕh đak, Thủ tướng Nguyễn Xuân Phúc pơ gơ̆r hop akŏm Anĭh pơ gơ̆r chih tơ lĕch kơ sơ̆p Hla ar Jơ hnơr iung jang kơ Khul kơ dră tĕh đak Việt Nam. Găh dôm tơ mam tơm đơ̆ng Jơ hnơr iung jang kơ Khul kơ dră tĕh đak Việt Nam (đei kơ sơ̆p hla ar, um rup păng phim), Anĭh tơm jang nô̆i vŭ, anĭh jang găh Anĭh pơ gơ̆r chih ăn tơ băt, đei kơ sơ̆p hla ar 4 tơ̆p (‘nŏh Kơ sơ̆p rim sơ năm păng kơ sơ̆p Jơ hnơr iung jang đơ̆ng Khul kơ dră tĕh đak Việt Nam đơ̆ng 1945 truh 2015) tơ chĕng adrol vă tơ lĕch pơ ma nuh, hơ met pơ ‘lơ̆ng lơ̆m sơ năm 2021.

Thủ tướng Nguyễn Xuân Phúc ăn tơ băt, ‘nâu jĭ kơ sơ̆p chih găh jơ hnơr iung jang tôch gĭt kăl kơ na athei chih hơ met mă ‘lơ̆ng, mă tôm. Anĭh jang kơ tă ‘nŏh jĭ Anĭh tơm jang Nô̆i vŭ, dôm bơ ngai vang jang, dôm anĭh jang đei pơ jao athei dăr hơ len, pơ gơ̆r jang mă ‘lơ̆ng, mă loi athei đei hop akŏm pơ ma nuh, iŏk nơ̆r tơ gop đơ̆ng dôm bơ ngai juăt jang, bơ ngai jang khoa hŏk, mă loi jĭ bơ ngai jang lơ̆m Khul kơ dră tĕh đak kiơ̆ rim jăl jang. Đơ̆ng rŏng kơ đei Khul kơ dră tĕh đak ‘nao, Anĭh tơm jang nô̆i vŭ athei hơ met pơ ‘lơ̆ng Anĭh pơ gơ̆r chih, hơ met ming păng tơ plih dôm bơ ngai hlôi năm jang tơ̆ nai dăh mă đĭ pơ dơ̆h hưu bơih, pơm ‘lơ̆ng trŏ tơ drong hơ găt bơ̆ jang, chih tơ lĕch kơ sơ̆p hla ar.

Dơ̆ng: Tơ blơ̆