VOV4.Bahnar - Lơ̆m kơ sơ̆ ‘năr 3/6, Thủ tướng teh đak păng rim bơ ngai jang lơ̆m khŭl Kơ dră teh đak hlôi pơ ma dơ nuh găh Tơ drong jang bơ̆ jang kiơ̆ ming man trong gre kơ dâu hrĕnh jăl jang 2021 - 2025 păng trong vă jang truh sơ năm 2030. Hăm tơ drong jang bơ̆ jang kiơ̆ ming man trong gre kơ dâu hrĕnh jăl jang 2021 - 2025 păng trong vă jang truh sơ năm 2030, Thủ tướng hơ len lăng hơ dăh, tơ drong hơ tŏk tơ iung tơ drong jang pơm trong gre kơ dâu hrĕnh, hăm 4.000 km lơ̆m 10 sơ năm truh ‘noh jĭ 1 tơ drong tôch kơ mơ mat tat, yua thoi noh kăl kơ hơ vơn pơ đĭ khŭl jang chĭnh trĭ păng đĭ đăng kon pơ lei mơ̆t jang. Thủ tướng Phạm Minh Chính athei ming man trong gre kơ dâu hrĕnh athei vei sơ đơ̆ng ‘lơ̆ng đei yua păng hơ len lăng đei ƀơm truh rim tơ drong. Vă bơ̆ jang kiơ̆ đei tơ drong hơ găt, kiơ̆ kơ Thủ tướng tơ drong jang kăl kơ pơ jing 3 tơ drong ‘lơ̆ng: găh hơ vơn jên; klăih song kơ chư̆k vei lăng, iŏk jang; tơ drong teh păng tơ mam pơ yua ăn ming man trong kơ dâu hrĕnh. Thủ tướng pơ jao kơ Anih tơm vei lăng trong nơ năm, gre kơ dâu chih kŏk dôm nơ̆r tơ gop, jang hơ dai hăm rim anih tơm, anih jang, tơ ring ƀơm truh jang pơ keh tơ drong jang vă khŭl kơ dră teh đak, tơ roi, apĭnh tơ gop nơ̆r đơ̆ng Anih tơm Chĭnh trĭ păng Kuôk hô̆i.

Thuem: Tơ blơ̆