VOV4.Bahnar - Kơsơ̆ brei, năr 22/3, tơ̆ hơnĭh bơ̆ jang Khŭl kơdră chĕp pơgơ̆r tĕh đak, Jơnŭm jang Pơting bơ̆ jang - Pôk hơpăh Trung ương hlôi pơgơ̆r hop akŏm joăt joe kơ yuơ Thủ tướng Nguyễn Xuân Phúc, Kơdră chĕp pơgơ̆r Jơnŭm pơm tơm.

Thủ tướng Nguyễn Xuân Phúc iung pơma tơ̆ hop akŏm

Iung pơma tơ̆ hop akŏm, Thủ tướng Nguyễn Xuân Phúc hơlen, lơ̆m khei ‘năr sơnăm au ki tĕh đak tơ ƀơ̆p tôch lơ tơdrong tơnap tap, bơ̆ jang pơting dih băl jang pran kơtang, pôk hơpăh hlôi đei tơplĭh ‘nao, ‘lơ̆ng hơ iă, tơgăl hăm tơdrong jang đei pơjao. Lơ̆m khei năr kơnh, Thủ tướng athei pơgơ̆r tơlĕch jang pơting dih băl ƀlep hloh dơ̆ng, jơnei hlŏh dơ̆ng, ‘moi kiơ̆ trong pơchŏh hơdrol, nơr pơrô̆ iung jang đơ̆ng Tổng Bí thư, Kơdră chĕp pơgơ̆r Tĕh đak păng 5 tơdrong pơting dĭh băl kơ yuơ Thủ tướng Tĕh đak tơlĕch ăn tơ̆ Pơm lê̆h hop akŏm Pơting dĭh băl ‘mêm kơ eng tĕh đak lơ̆m tĕh đak ‘măng mă X. Thủ tướng jei athei atŏk kơtang bơ̆ jang pơrô̆ pơrôp, tơroi tơbăt rim tơdrong jang pơting dĭh băl mă ƀlep, jơnei, rim tơdrong jang ‘lơ̆ng hơ iă, bơngai ‘lơ̆ng, tơdrong jang hơ iă. Bơ̆ jang pôk hơpăh sơđơ̆ng ƀlep tơdrong tơchơ̆t, tơtom, rơhăo. Pơting dĭh băl jang pôk hơpăh kăl lăng trŭh tơring.

Tơblơ̆ nơ̆r: Amazưt