VOV4.Bahnar - Đơ̆ng rŏng ‘măng năm tơ mang păng bơ̆ jang kơ tă ‘nao âu tơ̆ 1,2 anih pơm tơ lĕch vaccine, tơ mam pơ gang pơ yua ăn tơ drong jang tang găn jĭ COVID-19, Thủ tướng Phạm Minh Chính athei, kăl akŏm chĕp kơ̆l, pơ gơ̆r, pơm tơ drong hiôk hloh mư̆h kĕ, tơ gŭm hơ drol hơ met kon jên vă pơ trŭt hrĕnh tơ drong tơ chĕng hơ len, pơ jao kơ măy kơ mŏk vă jăh gơ̆h yua vaccine pơm tơ lĕch lơ̆m teh đak, tơ tom pơ yua ăn tơ drong jang tang găn jĭ COVID-19. Hơ drin hiơ̆ hloh ‘noh lơ̆m khei 6 sơ năm 2022 gô kĕ pơm tơ lĕch đei vaccine. Kiơ̆ lơ̆m tơ drong tơ chĕng hơ len athei tơ păt, mă hơ len, rim anih tơm, anih jang, tơ ring ƀơm truh kăl kơ hơ tŏk ‘lơ̆ng hơ năp jang, pơm tơ drong hiôk, tơ gŭm hơ met pơ ‘lơ̆ng mơ mat tat, tơ hlăk tơ hlĭn ăn tơ drong jang pơ jao, tơ chĕng hơ len, pơm tơ lĕch vaccine. Thủ tướng pơ jao kơ Anih tơm vei lăng găh jang pơ gang pơ gơ̆r, jang hơ dai hăm rim Anih tơm, anih jang ƀơm truh pơ jing Trong tơ lĕch jang pơ jao, tơ chĕng hơ len, pơm tơ lĕch drơ̆ng ăn vaccine, lơ̆m noh đei vaccine bơ̆ng jĭ COVID-19 kiơ̆ ƀlep trong jang, tơ drong hơ găt vei sơ đơ̆ng tơ tom păng tơ chĕng hơ len tơ lĕch kiơ̆ hla ar tơ tĕnh găh tơ drong khei ‘năr, tơ roi tơ băt rim kơ dră gơ̆h kĭ set hơ len, tơ chơ̆t.

Thuem: Tơ blơ̆