VOV4.Bahnar - Pơgê năr 7/6, Thủ tướng Tĕh đak Phạm Minh Chính bơ̆ jang hăm kơdră chĕp pơgơ̆r rim Hơnĭh tơm, hơnĭh bơ̆ jang, rim bơngai khoa hŏk,bơngai tang măt rim Hơnĭh tơm chă tơchĕng, rim kơdră chĕp pơgơ̆r hơnĭh pơm tơlĕch vaccine găh bơ̆ jang chă tơchĕng, pơm tơlĕch vaccine tang găn COVID-19.

Thủ tướng bơ̆ jang hăm rim hơnĭh pơm tơlĕch vaccine tang găn jĭ Covid-19

Tang măt ăn Dơnŏ anĭh tơm vei lăng jang pơgang hlôi tơroi tơbăt ăn Thủ tướng găh mĭnh ƀar tơdrong pơtôch chă tơchĕng jang kiơ̆ khoa hŏk kmăi kmŏk kơ hơnĭh jang pơgang tơgŭm ăn tang găn jĭ Covid-19 lơ̆m khei năr au ki. Lơ̆m au, chă tơchĕng pơm tơlĕch kĭt khăm hơlen, kĭt tang găn jĭ hơnhăk Việt Nam jing 1 lơ̆m 5 tĕh pơm tơlĕch gơ̆h kơ loăi kĭt au. Trong khăm hơlen RT-PCR ‘măng mă blŭng iŏk đei jơnei hơ iă, rŏ năng gô tơmơ̆t jang kiơ̆ lơ̆m khei năr kơnh. Trŭh dang ei, lơ̆m tĕh đal đei 2 hơnĭh pơm tơlĕch tŏk bŏk chă tơchĕng vaccine tang găn Covid-19 ‘nŏh vaccine Nanocovax kơ Kŏng ty Kmăi kmŏk sĭnh hŏk Dược Nanogen păng vaccine COVIVAC Viện Vaccine păng tơmam drăm Nha Trang. Iung pơma tơ̆ jơ bơ̆ jang, Thủ tướng Phạm Minh Chính, tơdrong iŏk đei vaccine tang găn COVID-19 ư̆h kơ ƀônh, mă kăl lơ̆m khei ‘năr jĭ hơbŭh tơpoh kơtang lơ̆m plei tĕh, tơdrong pơm gơ̆h vaccine tim gan kĕ. Thủ tướng athei rim kơdră tang măt chă pơma dơnŭh kơtang lơ̆m tơdrpng kĕ jang, tơmam drăm đei, tơdrong ‘mĕh vă, tơdrong jang pơm tơlĕch, vei lăng, pơgơ̆r ƀet vaccine lơ liơ mă kĕ sĭt ‘lơ̆ng.

Tơblơ̆ nơ̆r: Amazưt