VOV4.Bahnar - Thủ tướng Phạm Minh Chính, Kơ dră Anih pơ gơ̆r jang kơ teh đak tang găn jĭ COVID-19 hlôi bơ̆ jang trực tuyến hăm Anih pơ gơ̆r jang pêng dêh char Phú Thọ, Sóc Trăng, Cà Mau. ‘Măng bơ̆ jang vă hơ len lăng tơ drong jang tang găn jĭ, hơ dai hăm ‘noh răp mơ̆ng dôm nơ̆r tơ gop, tơ roi plơ̆ đơ̆ng rim tơ ring găh tơ drong hơ găt pơ gia pơm lăp sơ đơ̆ng, tơ tĕnh, vei lăng đei yua jĭ hơ buh. Pơ ma tơ̆ jơ bơ̆ jang, Thủ tướng Phạm Minh Chính athei dôm dêh char Phú Thọ, Sóc Trăng, Cà Mau tơ tĕnh vei lăng dôm hơ nih đei jĭ ‘nao dơ̆ng, hơ drin jang kiơ̆ dôm trong jang hlôi đei athei drơ̆ng 1 nơ̆r đơ̆ng Trung ương hăm 3 anih jang tơm. Thủ tướng pơ ma hơ dăh, ƀơ̆t jang kiơ̆ pơm lăp sơ đơ̆ng, tơ tĕnh, vei lăng đei yua jĭ hơ buh oei athei pơm kiơ̆ tơ păt trong jang kăl "5K + vắc-xin + hơ met jĭ + kơ măy kơ mŏk păng hơ tŏk ‘lơ̆ng đon băt kơ chăng đơ̆ng kon pơ lei”. Thủ tướng kŭm athei rim tơ ring kăl hơ nơ̆ng jang hơ dai kơ jăp, đei yua hloh dơ̆ng lơ̆m tơ drong sơng iŏk, ba bơ ngai đơ̆ng tơ ring âu năm tơ̆ tơ ring nai vei sơ đơ̆ng dôm trong jang pơ gang păng vei sơ đơ̆ng tơ drong arih sa tơ pôl ăn kon pơ lei.

Thuem: Tơ blơ̆