VOV4.Bahnar - Tơdrong pơgơ̆r lĕch mŭh măt Hơnĭh mong jên răt răk vaccine Covid-19 đei pơgơ̆r lơ̆m gơmăng năr Tơdrau, năr 5/6/2021, tại Hà Nội. Thủ tướng Tĕh đak Phạm Minh Chính gô atŭm hăm kơdră chĕp pơgơ̆r Mặt trận Tổ quốc Việt Nam, rim hơnih tơm, hơnĭh bơ̆ jang, rim khŭl jang chĭnh trĭ tơpôl, tang măt ăn kon pơlei păng khŭl mơdro sa gô vang năm ‘măng pơgơ̆r gĭt kăl au.

Tơdrong pơgơ̆r au vă krao hơvơn kon pơlei, ƀô̆ đô̆ui lơ̆m tĕh đak, kon pơlei oei tơ̆ tĕh đak đe, rim hơnih mơdro sa, rim bơngai mơdro sa, rim khŭl, rim bơngai lơ̆m tĕh đak păng tĕh đak đe vang chă tơra tơgop, tơgŭm djru ăn Hơnĭh mong jên răt răk vaccine Covid-19 hăm jơhngơ̆m đon ‘mêm mơnat păng hơnăp jang kơ yuơ jơhngơ̆m pran jăng grăng akau kơ rim bơngai, kơ yuơ tơpôl, kơ yuơ tĕh đak, hơdrĕch hơdrung hăm jơhngơ̆m đon tơgoăt tơgoăl pôm nơ̆r ƀơ̆r đon apŭng plĕnh tĕh, vang kơrŭn pơrăm kĕ jĭ hơbŭh tơ̆ rim tĕh đak păng lơ̆m plei tĕh. Tơchĕng hơlau, Việt Nam kăl răt đei 150 trĭu kơliêu vaccine tang găn jĭ Covid-19 vă ƀet bơ̆ng ăn dang 75 trĭu ‘nu kon pơlei, hăm akŏp kon jên ‘mĕh vă đei dang 25.200 ti hlak jên.

Tơblơ̆ nơ̆r: Amazưt