VOV4.Bahnar - Kơ sơ̆ ‘năr 31/8 Thủ tướng teh đak Phạm Minh Chính hlôi năm hơ len lăng Hnam pơ gang hơ met bơ ngai jĭ COVID-19 tơ̆ Hà Nội găh Hnam pơ gang Đại học Y Hà Nội tơ̆ phường Yên Sở, quận Hoàng Mai, pơ lei tơm Hà Nội păng hơ len lăng dôm hơ nih tơ tŏ găh jĭ covid -19 lơ̆m quận Thanh Xuân, Hà Nội. Tơ̆ ‘măng hop akŏm hăm kơ dră chĕp kơ̆l pơ lei tơm Hà Nội pơ gơ̆r hloi đơ̆ng rŏng kơ năm hơ len lăng tơ drong tơ̆ tơ ring, Thủ tướng Phạm Minh Chính tơ roi rơ đăh, jĭ hơ buh oei đei ƀôh mơ mat tat, kon pơ lei Hà Nội lĕch tơ̆ trong oei tôch kơ lơ, yua thoi noh Thủ tướng akhan, tŏk bŏk jang kiơ̆ tơ drong tơ chơ̆t 16 ‘noh thoi noh tam mă iŏk đei ‘lơ̆ng. Thủ tướng athei, xăh, phường athei pơ gơ̆r hơ len lăng kiơ̆ nơ̆r pơ tho. Athei jang mă tơ tĕnh. Xăh, phường iŏk, vei lăng, hơ met hrĕnh hloh tôch ai, ăn tơ drong hơ met jĭ truh jê̆ kon pơ lei hloh, hrĕnh hloh vă tơ jur lôch, veh ver đei hrăt hrot ăn  hnam pơ gang, kon pơ lei kŭm sơ đơ̆ng yua kơ đei hơ met hrôih.

Thuem: Tơ blơ̆