VOV4.Bahnar - Kơsơ̆ năr 15/9, Thủ tướng Tĕh đak Phạm Minh Chính pơm tơm Hop akŏm lơ̆m tĕh đak “Khŭl jang khoa hŏk păng kmăi kmŏk Việt Nam tơlĕch jang kiơ̆ Tơdrong tơchơ̆t Pơm lê̆h hop akŏm mă XIII kơ Đảng”.

Thủ tướng hôn bơnê tơdrong tơgop tĭh tên đơ̆ng khul jang khoa hŏk păng kmăi kmŏk

Iung pơma tơ̆ hop akŏm, Thủ tướng Tĕh đak Phạm Minh Chính tang măt ăn Kơdră chĕp pơgơr Đảng, Tĕh đak, hôn bơnê păng bơnê dôm tơdrong tơgop tĭh tên đơ̆ng khŭl jang khoa hŏk păng kmăi kmŏk, đơ̆ng lơ jơhnơr rim bơngai jang khoa hŏk lơ̆m tĕh đak, kơ Jơnŭm rim Khŭl jang khoa hŏk păng Kih thuơ̆t Việt Nam. Trŭh au kơnh, tơdrong lơ̆m apŭng plĕnh tĕh đei lơ tơdrong tơplĭh, jĭ hơbŭh Covid-19 rŏ năng oei pơrăm kơtang đĕch păng pơm kơnê̆ trŭh tơdrong jang mŭk drăm apŭng plĕnh tĕh, tơring, lơ̆m au đei tĕh đak bơ̆n. Thủ tướng athei: “bơ̆n kăl đei jơhngơ̆m đon hơdrin kơtang hlŏh dơ̆ng, tơgoăt mĭnh ƀơ̆r đon hlŏh dơ̆ng vă hơdrin jang keh kong Tơdrong tơchơ̆t Pơm lê̆h hop akŏm XIII kơ Đảng”. Hăm hơnăp jang ‘nŏh hơnĭh tang măt ăn khŭl jang khoa hŏk păng kmăi kmŏk, Jơnŭm khŭl jang păng rim hơnĭh jang găh au kăl jang ‘lơ̆ng hlŏh dơ̆ng hơnăp jang ‘nŏh yŭk trong hơlau jang chĭnh trĭ, tơ iung pơjing khul tơgoăt tơgoăl vă tơgop jang keh đang rim trong tơlĕch jang chinh trĭ kơ tĕh đak lơ̆m chăl hle”.

Tơblơ̆ nơ̆r: Amazưt