VOV4.Bahnar – Pơgê 'năr brei (26/5), Thủ tướng teh đak bơ̆n Phạm Minh Chính bơ̆ jang trư̆k tuyê̆n hăm dêh char Bắc Giang păng dêh char Bắc Ninh vă tơlĕch dôm trong jang kăl hăm tơdrong hơbuh hli đơ̆ng pơrang jĭ Covid-19 ƀơ̆t kơsô̆ bơngai ƀơm jĭ pơtoi tŏk lơ, tơpoh tenh. Tơ̆ hop akŏm, Thủ tướng Phạm Minh Chính pơkăl kơdră kơ dôm dêh char Bắc Giang, Bắc Ninh păng dôm Anih jang tơm, anih jang đei tơrĕk, tơroi, xơkơ̆t tơdrong đei ƀôh duh nhen tơlĕch dôm trong jang pơtoi vă tenh kuăng tơpuh lê̆ pơrang jĭ tơ̆ tơring âu. Kiơ̆ kơ rim anih jang tơm, trong jang dơnơm hloh dang ei noh pơm rơgoh anih jang kŏng ngĭp, pơm rơgoh hăm dôm trong chă hơlen pruih pơgang pơlôch xơmach tơtenh, hơlen 3 năr minh 'măng hăm anih jang kŏng ngĭp, hơlen băt 'nhăk F0 lĕch đơ̆ng tơring hơbuh pơrang hrôih hloh, pơdơh lê̆ tơdrong 'nhăk bơngai jang đơ̆ng hnam kơmăi hăm dih băl. Pơih xă tơdrong pơkăp tơklăh oei pha lơ̆m jâ̆p dêh char, hơlen kơjăp dôm tơring tơklăh oei pha găh y tê̆, ưh đei lê̆ tơdrong tơpoh dih băl lơ̆m tơpôl.

Lan chih păng pơre nơ̆r