VOV4.Bahnar  – Thủ tướng Phạm Minh Chính pơgơ̆r tơdrong hop akŏm trư̆k tuyê̆n đơ̆ng Anih juăt jang kơ Khul kơpal teh đak hăm plei tơm Hồ Chí Minh păng dôm dêh char Bình Dương, Đồng Nai, Long An găh tơdrong jang tang găn păng tơjră pơrang jĭ COVID-19, lơ̆m khei năr pơrang jĭ tŏk bŏk oei hơbuh hli hlơt tơ̆ plei tơm Hồ Chí Minh.

          Tơ̆ hop akŏm, Anih juăt jang kơ Khul kơpal teh đak păng Khul kơdră plei tơm Hồ Chí Minh drơ̆ng nơ̆r tơlĕch jang kơhret hloh, kơjăp hloh Tơchơ̆t 16, iŏk yua minh ƀar trong jang kơtang hloh, kơjăp hloh păng đei jơnei hloh vă tang găn păng tơjră keh kong pơrang jĭ kiơ̆ pơkăp “rim xăh phương noh minh anih pơgăn kơjăp” hăm pơrang jĭ. Pơma kiơ̆ trŏ ƀlep tơdrong pơkăp oei tơklăh vă tang găn tơpoh lang xă, tơjur kơsô̆ bơngai FO, tơjur kơđeh hloh kơsô̆ bơngai lôch. Gô đei minh ƀar tơdrong ưh hơ iă, tơdrong erih hơbŏ gô ƀơm tơnap tap hloh mă lei đĭ đăng kơyuơ jơhngơ̆m jăn păng xơđơ̆ng tơdrong erih ăn kon pơlei vă kon pơlei gơh đei yua phĭ tơtŏ dơnŏ 'lơ̆ng. Thủ tướng ră hơdăh, athei pơgơ̆r hơlen “tenh kuăng” kiơ̆ pơtho đơ̆ng Anih tơm Y tê̆ hăm dôm trong jang trŏ ƀlep, jô̆ hloi truh hơlen xet ngĭm tơ̆ hnam, tơklăh hloi F0 đơ̆ng jơnŭm tơpôl.

Lan chih păng pơre nơ̆r