VOV4.Bahnar - Pơ gê (9/5), Thủ tướng Nguyễn Xuân Phúc truh ako\m păng iung pơ ma lơ\m Hop ako\m te\h đak ato\k tơ iung an^h jang kơ măy ‘nao rơ gei Việt Nam Made in Vietnam, hăm hơ năn: "Hơ pơi ‘me\h, lăng hơ drol păng trong jang to\k yoa 1 Việt Nam pran kơ tang".

Thủ tướng Nguyễn Xuân Phúc pơ ma hơ dăh, kơ măy kơ mo\k ‘nao rơ gei j^ trong yak ưh gơ\h ver vă te\h đak jang ato\k tơ iung mu\k drăm, to\k klăih đơ\ng te\h đak jang xa đei io\k yoa lăp ai. ‘No\h j^ tơ drong athei io\k yoa kơ măy ‘nao đơ\ng kon bơ ngai vă sek tơlang dôm tơ drong kăl kơ Việt Nam păng ato\k tơ iung kơ măy ‘nao tơ\ Việt Nam vă sek tơ lang dôm tơ drong kăl lơ\m plei te\h. Lơ\m no\h, an^h jang kơ măy ‘nao rơ gei j^ tơm dơ nơm vă bơ\ jang đei 1 tơ drong hơ pơi ‘me\h jing 1 hơ dre\ch hơ drung pơ dro\ng, gơ\h hơ gei lơ\m sơ năm 2045.

Thủ tướng ăn tơ băt, đơ\ng ro\ng kơ hop ako\m, kơ tă lơ\m khei 6, Thủ tướng vă pơ tho ăn dôm an^h tơm, an^h jang kơ pal pơ jing m^nh tơ drong jang đơ\ng Khul kơ dră te\h đak găh ato\k tơ iung an^h jang kơ măy kơ mo\k ‘nao rơ gei, kiơ\ đơ\ng no\h, chih tơ le\ch luơ\t, pơ jing tơ drong ‘lơ\ng ăn an^h jang kơ măy ‘nao jang to\k.

Dơ\ng: Tơ blơ\