VOV4.Bahnar - Jei tơ̆ pơgơ̆r blŭng a ‘măng hop akŏm mă 11, Kuô̆k hô̆i jăl XIV, Thủ tướng Nguyễn Xuân Phúc đŏk tơbăt Hla bơar chĭh tơbăt tơdrong bơ̆ jang jăl jang  2016-2021 đơ̆ng Khŭl kơdră chĕp pơgơ̆r tĕh đak.

Hăm trong jang “Khul kơdră chĕp pơgơ̆r tĕh đak gơ̆h hơgei atŏk tơ iung, tơpăt ‘lơ̆ng, iung jang kơtang, jang tơgŭm ăn Kon pơlei”, jăl jang au ki, Khŭl kơdră chĕp pơgơ̆r tĕh đak, Thủ tướng tĕh đak hlôi akŏm pơrô̆ athei rim hơnĭh bơ̆ jang iung jang kiơ̆ kơtang, jơnei rim trong tơlech jang, tơdrong jang lơ̆m rim tơdrong. Thủ tướng Nguyễn Xuân Phúc sơkơ̆t hơdăh, Khul kơdră tĕh đak sơkơ̆t hơdăh trong tơlĕch jang sơđơ̆ng jang mŭk drăm, kĕ vei lăng năng tông tơdrong tŏk jur kơ jă, sơđơ̆ng ăn pơ prŏ lơ, pơjing rơvơn ăn atŏk kơtang mŭk drăm, lăng ‘nau jing tơdrong jang tơm hlŏh lơ̆m bơ̆ jang chĕp pơgơ̆r. Mă kăl, Khŭl kơdră chĕp pơgơ̆r tĕh đak, Thủ tướng Tĕh đak hlôi iung pơrô̆ jang tôch kơtang tơlĕch jang kiơ̆ rim tơdrong vă jang, tơdrong jang tơm đơ̆ng Dơnŏ anĭh chĕp pơgơ̆r Trung ương găh tang găn sa pơgơ̆m pơjĭp. Xek tơlang lơ tơdrong, iŏk tơvĭh lơ kon jên păng mŭk drăm; pơjing Khŭl bơ̆ jang git kăl vă xek tơlang keh đang lơ tơdrong tơkêng mơmat tat, đunh đai.

Tơblơ̆ nơ̆r: Amazưt