VOV4.Bahnar - Gơ măng 24/3, Thủ tướng Nguyễn Xuân Phúc hlôi pơ ma điên thoăi hăm Kơ dră tơm tĕh đak Cộng hòa Chile Sebastian Piñera vă pơ ma găh dôm trong jang tôch rơ đăh vă hơ tŏk tơ drong pơ vei jang hơ doi gĭt kăl tôm tơ drong Việt Nam-Chile.

Thủ tướng Nguyễn Xuân Phúc pơ ma điên thoăi hăm Kơ dră tơm Chile

Thủ tướng Nguyễn Xuân Phúc tơ chĕng ‘lơ̆ng tơ drong pơ vei Việt Nam-Chile hlôi đei hơ yak tŏk pran đơ̆ng rŏng 50 sơ năm păng pơ ma hơ dăh Việt Nam hơ pơi ‘mĕh hơ nơ̆ng pơm pơ ‘lơ̆ng hlŏh dơ̆ng tơ drong pơ vei đơ̆ng 2 tĕh đak, mă loi jĭ găh mŭk drăm, tĕch mơ dro păng tơ mât jên jang.

Kơ dră tơm Sebastian Piñera tơ ƀôh đon, Chile năng kăl tơ drong pơ vei ‘lơ̆ng hơ iă đơ̆ng sơ̆ hăm Việt Nam, tơ chĕng ‘lơ̆ng dôm tơ drong adrin ‘nao âu đơ̆ng Khul kơ dră tĕh đak Việt Nam lơ̆m tơ drong tơ jră hăm jĭ COVID-19 păng vei kơ jăp tơ drong jang tŏk mŭk drăm.

2 ‘nu kơ dră chĕp kơ̆l drơ̆ng nơ̆r hăm 1,2 trong jang vă hơ tŏk tơ drong pơ vei ‘lơ̆ng hơ iă đơ̆ng sơ̆ păng jang hơ doi tôm tơ drong đơ̆ng 2 tĕh đak tơ̆ hơ năp kơnh, đei hloi vei kơ jăp tơ drong tơ ƀâp ăn kuan tih, tơ lĕch jang ‘lơ̆ng, đei yoa dôm tơ drong jang hơ doi, vang tưk tơ iung tơ drong jang hơ doi, tĕch mơ dro lơ pang păng jơ̆p tơ ring ƀât mă mŭk drăm păng tĕch mơ dro lơ̆m plei tĕh oei pŭ răm tôch dêh yoa đơ̆ng jĭ COVID-19.

Dơ̆ng: Tơ blơ̆