VOV4.Bahnar - Kơ sơ̆ ‘năr 23/3, tơ̆ Anih bơ̆ jang kơ Khŭl kơ dră teh đak, Thủ tướng Nguyễn Xuân Phúc sơng Kơ dră tang măt teh đak Cộng hòa Áo Thomas Schuller-Gotzburg păng ƀok Ingolf Schroeder, Kơ dră vei lăng Kŏng ti AT&S tŏk bŏk năm tơ chă hơ nih tơ mơ̆t jên jang tơ drong jang kơ măy kơ mŏk ‘nao tih. Thủ tướng Nguyễn Xuân Phúc hôn bơ nê kơ ƀok Ingolf Schroeder păng dôm bơ ngai jang kơ Kŏng ti AT&S năm tơ chĕng hơ len tơ mơ̆t jên jang, tĕch mơ dro tơ̆ Việt Nam. Kơ dră tang măt teh đak Áo tơ ƀôh đon lui ngeh tơ drong jang mă AT&S tơ lĕch jang gô lăp hăm hơ tŏk tơ iung kơ Việt Nam găh sơng đei tơ mơ̆t jên jang kơ măy kơ mŏk ‘nao. ‘Nâu jĭ tơ drong jang tơ mơ̆t jên jang lơ dang 1,5 ti euro, sơng dang 6.000 ‘nu bơ ngai jang.

Hôn bơ nê dôm nơ̆r tơ gop đơ̆ng AT&S, Thủ tướng Nguyễn Xuân Phúc tơ roi hơ dăh, rim tơ drong jang tơ mơ̆t jên jang FDI adoi jơ nei ‘lơ̆ng ngăl. Khŭl kơ dră teh đak Việt Nam pơm tơ drong hiôk ăn  kơ rim bơ ngai tơ mơ̆t jên jang teh đak đe jang sa jơ nei tơ̆ Việt Nam. Thủ tướng akhan tơ drong nih jang kăl tơ̆ Thái Nguyên păng pơ lei tơm Hồ Chí Minh adoi tôch kơ hiôk. ‘Nâu kŭm jing tơ drong ‘lơ̆ng hăm rim anih jang mơ dro sa tih đơ̆ng teh đak đe. Thủ tướng ‘meh vă AT&S jăh tơ lĕch tơ drong tơ chơ̆t tơ mơ̆t jên jang.

Thuem: Tơ blơ̆