VOV4.Bahnar - Kơsơ̆ năr 17/3, tơ̆ Hơnih bơ̆ jang Khŭl kơdră Tĕh đak, Thủ tướng Nguyễn Xuân Phúc sơng pơma dơnuh hăm Kơdră tang măt Philippines Meynardo Los Banos Montealegre trŭh kuh ka hla bat. Thủ tướng Nguyễn Xuân Phúc hmach bơnê kơ Ƀok Meynardo Los Banos Montealegre jing Kơdră tang măt tĕh đak Philipines tơ̆ Việt Nam păng tơbăt, lơ̆m dôm sơnăm au ki, tơdrong tơgoăt tơgoăl ƀả tĕh đak atŏk tơ iung ‘lơ̆ng lơ̆m lơ tơdrong mă kăl lơ̆m tơdrong chơ choĕn trong đak. Thủ tướng pơma tơbăt jơhngơ̆m đon lui tơpă kơ Ƀok Kơdră tang măt gô bơ̆ jang jơnei keh kong tơdrong jang tơ̆ Việt Nam. Thủ tướng jei tơbăt, Việt Nam dang ei hlôi tang găn kĕ jĭ Covid-19 păng atŏk jang sa iŏk yua kơ jăp. ‘Nau jing tơdrong rơvơn hlŏh ăn tơdrong atŏk tơ iung mŭk drăm-tơpôl tơ̆ Việt Nam. Việt Nam ling lang lăng kơ jăp tơdrong tơgoăt tơgoăl Jang hơdoi gĭt kăl hăm Philipines, lơ̆m au tơgoăt tơgoăl jang hơdoi lơ̆m tơdrong jang chơ choĕn tơmam drăm trong đak ‘nŏh kăl hlŏh. Thủ tướng athei ƀar tĕh đak kăl pơtrŭt kơtang hlŏh dơ̆ng mơdro sa păng tơmơ̆t jên jang.

Tơblơ̆ nơ̆r: Amazưt