VOV4.Bahnar - ‘Năr 21-3, dêh char Long An hlôi pơ gơ̆r lêh et hơ tŏk Hơ nih jang kơ măy kơ mŏk gơng tơ nŏk Phước Đông.  Hơ nih jang kơ măy kơ mŏk âu să vă jê̆ 130 hek tar, oei lơ̆m hơ nih trong nơ năm hiôk pơ đĭ găh trong nơ năm păng trong đak, tơ ƀưh hăm trong gre tơm 50, pơ lei tơm Hồ Chí Minh păng dôm dêh char Tơ ring tơ măn đak krong Cửu Long. Vang năm păng iung pơ ma tơ̆ lêh et hơ tŏk, Thủ tướng teh đak Nguyễn Xuân Phúc chih iŏk, lăng ‘lơ̆ng dôm tơ drong hơ drin, iŏk yua sơng đei yơ mơ̆t jên jang khei ‘năr âu ki kơ dêh char Long An. Thủ tướng athei dêh char Long An kăl kơ pơm tơ drong hiôk, bơ ngơ̆t trŭh, hơ met pơ ‘lơ̆ng dôm tơ drong mơ mat tat, tơ hlăk tơ hlin ăn kơ anih jang mơ dro sa, bơ ngai tơ mơ̆t jên jang bơ̆ jang, mă loi ‘noh lơ̆m khei ‘năr COVID-19.

Thủ tướng Nguyễn Xuân Phúc vang năm pơm lêh et hơ tok hơ nih jang kơ măy kơ mŏk gơng tơ nŏk Phước Đông

Thủ tướng athei dêh char Long An hơ nơ̆ng lăng kăl hơ tŏk tơ mam ‘lơ̆ng dang ei đei, hơ tŏk tơ iung hơ dai đơ̆ng tơ ring kơ drơ̆m păng tơ ring tơ rang, kăl kơ băt hơ dăh rim anih jang kơ măy kơ mŏk tơm đei yua akŏm hơ tŏk tơ iung, lăng kăl hơ tŏk tơ iung kơ măy kơ mŏk ‘nao, kơ măy kơ mŏk tơ gŭm. Hăm choh jang sa, akŏm tơ mơ̆t yua kơ măy kơ mŏk ‘nao vă hơ tŏk ‘lơ̆ng tơ drong arih sa kon pơ lei jang chŭn mir.

Thuem: Tơ blơ̆