VOV4.Bahnar - Thủ tướng teh đak Phạm Minh Chính ‘nao đei ‘măng hop akŏm trực tuyến hăm yă Aurélia Nguyen, Kơ dră vei lăng tơ drong jang COVAX. Tơ̆ ‘măng hop akŏm, Thủ tướng hôn bơ nê păng lăng ‘lơ̆ng hơ năp jang đơ̆ng COVAX lơ̆m tơ chă anih pơ truh, vei lăng, klăih song hơ tŏ hơ nơ̆ng vắc-xin bơ̆ng jĭ COVID-19 lơ̆m jơ̆p plei teh, vang tơ gop gĭt kăl lơ̆m hơ drin atŭm vă vei lăng jĭ hơ buh. Pơ ma dơ nuh hăm yă Aurélia, Thủ tướng pơ ma hơ dăh trong jang kơ jăp đơ̆ng Việt Nam ‘noh tơ lĕch jơ hngơ̆m pran păng sơ đơ̆ng ăn kon pơ lei ‘noh kăl hloh, Việt Nam tŏk bŏk hơ drin ƀet vắc-xin tôm ăn đĭ đăng kon pơ lei hrĕnh hloh tôch ai. Thủ tướng athei COVAX tơ gŭm hơ drol klăih song vắc-xin ăn Việt Nam roi hrĕnh roi ‘lơ̆ng, roi lơ roi ‘lơ̆ng, mă loi ‘noh jĭ lơ̆m dôm khei 9, 10 păng 11; jang đang drơ̆ng nơ̆r pơ truh vắc-xin ăn Việt Nam lơ̆m sơ năm 2021. Thủ tướng kŭm athei COVAX asong, pơ truh vắc-xin Moderna vă Việt Nam ƀet jrŭm mă 2 ăn kon pơ lei.

Thuem: Tơ blơ̆