VOV4.Bahnar - ‘Năr 27/6, Thủ tướng teh đak Phạm Minh Chính hlôi bơ̆ jang hăm Anih jang Đảng dêh char Đồng Nai găh tơ drong jang tang găn jĭ Covid-19 păng tơ drong hơ tŏk tơ iung mŭk drăm tơ pôl, vei lăng sơ đơ̆ng 6 khei blŭng sơ năm 2021, hơ năp jang tơm 6 khei hơ tuch sơ năm 2021. Đơ̆ng rŏng mơ̆ng tơ roi tơ băt đơ̆ng dêh char Đồng Nai păng dôm nơ̆r tơ gop đơ̆ng rim Anih tơm, anih jang, Thủ tướng pôk pơ ư dôm jơ nei mă dêh char Đồng Nai hlôi iŏk đei, tơ drong jĭ hơ buh đei vei lăng, tơ drong mŭk drăm tơ pôl đei sơ đơ̆ng, jang kiơ̆ vei sơ đơ̆ng tơ drong arih sa tơ pôl ‘lơ̆ng.

Thủ tướng teh đak Phạm Minh Chính bơ̆ jang hăm Anih jang Đảng dêh char Đồng Nai

Thủ tướng pơ ma hơ dăh, Đồng Nai đei anih dơ̆ng hơ năp jang tôch kơ gĭt kăl hăm tơ ring păng lơ̆m teh đak, athei hơ drin jang kiơ̆ tơ drong jang hơ dai. Dang ei tơ drong jĭ hơ buh đei ƀôh krê hơ mơt, dêh char athei băt hơ dăh khŏm tơ jră hăm tơ drong kơ nê̆ hloh. Đồng Nai kăl jang hơ dai kơ jăp hăm rim Anih tơm, anih jang vă hơ met pơ ‘lơ̆ng rim tơ drong ƀơm truh trong jang tơ gŭm, păng tơ drong pơ găn lơ̆m hơ tŏk tơ iung mŭk drăm.

Thuem: Tơ blơ̆