VOV4.Bahnar - Hơ nơ̆ng tơ drong jang ‘măng năm tơ mang tơ̆ teh đak Cộng hòa Phalăng, ‘năr 5/11, Thủ tướng Phạm Minh Chính păng khŭl tang măt gĭt kăl Việt Nam hlôi năm tơ mang, bơ̆ jang tơ̆ Anih jang Pasteur Paris. Kơ dră chĕp kơ̆l Anih jang Pasteur Paris tơ băt lơ̆m kơ sô̆ rim teh đak đei pơ vei jang hơ dai hăm Anih jang, Việt Nam đei hơ năp jang tôch gĭt kăl. Pơ ma tơ̆ jơ bơ̆ jang, Thủ tướng pơ ma hơ dăh, ‘nâu jĭ hơ nih mă khŭl Việt Nam ƀôh kăl kơ năm truh lơ̆m ‘măng năm tơ mang ‘măng âu, hơ nơ̆ng hơ met ming tơ drong pơ vei hăm rim Anih jang Pasteur. Tơ drong jang đơ̆ng rim Anih jang Pasteur ‘noh jĭ 1 păh pơm jing tơ klep hơ dai đơ̆ng Việt Nam păng Phalăng. Lơ̆m apŭng plĕnh teh, hui đei teh đak đei truh 3 Anih jang Pasteur nhen Việt Nam, klăih song tơ̆ pơ đĭ 3 tơ ring găh Tu, tŏk bŏk, pơ băh, ăn ƀôh tơ drong lăng hơ tăih đơ̆ng dôm bơ ngai năm hơ drol.

Kŭm lơ̆m ‘năr 5/11, Thủ tướng teh đak Phạm Minh Chính hlôi năm tơ mang tơ̆ Anih bơ̆ jang Pơ gơ̆r pơ tho pơ hrăm, khoa hŏk păng joh ayŏ kơ Liên hợp quốc (UNESCO) pơm tơ̆ Paris, Phalăng păng pơ ma dơ nuh hăm yă Audrey Azoulay, Kơ dră dơ nơm UNESCO. Drơ̆m kơ sơ̆ ‘năr 5/11, Thủ tướng teh đak Phạm Minh Chính hlôi lĕch đơ̆ng Paris, pơ tôch ‘lơ̆ng hơ iă pơ đĭ tơ drong jang năm tơ mang tơ̆ teh đak Cộng hòa Phalăng.

Thuem: Tơ blơ̆