VOV4.Bahnar - Thủ tướng Tĕh đak Phạm Minh Chính ‘nao đei jơ bơ̆ jang hăm Dơnŏ anĭh vei lăng kon pơlei dêh char Bình Dương găh bơ̆ jang tang găn jĭ Covid-19 păng atŏk tơ iung mŭk drăm-tơpôl. Lăp đơ̆ng rŏng mơ̆ng dêh char  Bình Dương tơroi tơbăt găh bơ̆ jang tang găn jĭ păng tơdrong jang mŭk drăm tơpôl păng nơ̆r tơgop đơ̆g rim Hơnĭh tơm, Thủ tướng hôn bơnê kơtang trong jang jơnei lơ̆m tang găn jĭ păng atŏk tơ iung mŭk drăm-tơpôl tơ̆ Bình Dương.

Thủ tướng Phạm Minh Chính bơ̆ jang hăm dêh char Bình Dương

Tơdrong jĭ oei tang găn kĕ, jang mŭk drăm tŏk 7%, thuê̆ ăn hơnĭh mong jên bơ̆ jang hlŏh 60%, tơdrong erĭh sa kơ kon pơlei tim mă đei ƀơm kơnê̆ kơtang, trong jang tơgŭm djru tơpôl đei vei kơ jăp jang kiơ̆ ‘lơ̆ng. ‘Nau jing dôm trong jang ‘lơ̆ng hơ iă đơ̆ng Bình Dương lơ̆m 6 khei blŭng sơnăm, kăl tơlĕch jang kiơ̆ ‘lơ̆ng hlŏh dơ̆ng, hơnơ̆ng hơlen kiơ̆ trong jang jơnei. Lơ̆m khei năr kơnh rŏ năng đei tơdrong mơmat tat, tơnap vei lăng kĕ tơdrong kơ yuơ rim bơngai jĭ F0 tim mă băt hơdăh đe sư tơpŏh jĭ đơ̆ng yơ. Tơdăh ư̆h kơ kĕ tang găn jĭ gô pơm kơnê̆ trŭh đĭ đang tơdrong jang chĭnh trĭ đơ̆ng dangei trŭh hơtuch sơnăm, mă kăl atŏk tơ iung mŭk drăm-tơpôl. Kơ yuơ lơ lŏh, kăl iung jang kơtang dăr lăng, tơ iung pơjing trong jang hơ iă, bơ̆ jang jơnei.

Tơblơ̆ nơ̆r: Amazưt