VOV4.Bahnar – Pơma tơ̆ 'măng pơm jang hăm dôm bơngai jang khoa hŏk, dôm anih jang mŭk drăm axong kơmăi kơmŏk, hơlen, pơm tơlĕch vaccine bơ̆ng jĭ COVID-19 vă pơtoi pơklaih tơnap tap, tơhlăk tơhlĭn, hơtŏk tơdrong jang âu đei pơgơ̆r lơ̆m năr 12/8, tơ̆ anih jang Khul kơpal teh đak, Thủ tướng Phạm Minh Chính pơkăl, tôm anih jang, rim tơ 'ngla đei xơnong athei adrin hloh dơ̆ng, jang atŭm kơjăp, tơnăp hloh dơ̆ng kơyuơ tơdrong pơkăp đei vaccine pơm tơlĕch lơ̆m teh đak hrôih hloh. Pơma pơih blŭng tơdrong pơm jang, Thủ tướng Phạm Minh Chính ră hơdăh, Khul kơpal teh đak, Thủ tướng teh đak, Jơnŭm pơgơ̆r jang kơ teh đak hlôi pơgơ̆r jang kơjăp, kon pơlei tơrĕk tơnăp găh trong pơm tơlĕch vaccine. Thủ tướng ră hơdăh “athei pơđăp păng jang khŏm mă đei” tơdrong pơm tơlĕch vaccine lơ̆m teh đak. Tơ̆ jơ bơ̆ jang, rim bơngai tang măt duh tơgŭm kơtang tơchơ̆t đơ̆ng Thủ tướng Phạm Minh Chính noh athei tơrĕk hơtŏ hơnơ̆ng hăm tôm kơloăi vaccine, “kơloăi vaccine tơnăp hloh noh vaccine đei axong ăn, đei ƀet pơgang hrôih hloh, tenh kuăng hloh, tơtom hloh”. Đei vaccine yă kiơ noh ƀet kơloăi mă noh. Dôm bơngai jang khao hŏk xơkơ̆t tơdrong xĭt đơ̆ng dôm kơloăi vaccine hlôi đei axong yua.

Lan chih păng pơre nơ̆r