VOV4.Bahnar - Kŭm lơ̆m ‘măng vang năm Hop akŏm COP26, tơ̆ Anh, Thủ tướng Phạm Minh Chính hlôi đei jơ bơ̆ jang hăm kơ dră chĕp kơ̆l Grŭp jang AstraZeneca păng dơ̆ng lăng lêh kĭ pơ kăp păng tơ băt hơ dăh dôm tơ drong drơ̆ng nơ̆r jang hơ dai đơ̆ng AstraZeneca hăm păh Việt Nam. AstraZeneca gô tơ mơ̆t jên jang 2 rơ bâu ti hlak jên (90 triệu đô lar) vă tơ gŭm Việt Nam hơ tŏk ‘lơ̆ng tơ drong pơm tơ lĕch pơ gang lơ̆m teh đak, tơ gŭm bơ ngai jĭ gơh yua ‘lơ̆ng hloh hăm dôm pơ gang ‘lơ̆ng đei pơm tơ lĕch tơ̆ Việt Nam.

Pơ ma tơ̆ jơ bơ̆ jang, Thủ tướng Phạm Minh Chính bơ nê kơ AstraZeneca hlôi pơ truh tơ tom vaccine ăn Việt Nam khei ‘năr âu ki, gơ nang đơ̆ng noh tơ gop gĭt kăl vei lăng jĭ Covid-19; tơ gop lơ̆m tơ drong jang vei lăng jơ hngơ̆m jăn ăn kon pơ lei. Thủ tướng ‘meh AstraZeneca jăh pơ jao đĭ kơ sô̆ vaccine uơ oei dơ̆ng hlôi pơ kăp ăn kơ Việt Nam ƀlep khei ‘năr; sơ kơ̆t hơ dăh Việt Nam ‘meh vă jang hơ dai hăm AstraZeneca đunh đai, vei sơ đơ̆ng jang pơ gang lơ̆m tơ drong apŭng plĕnh teh tŏk bŏk ưh kơ sơ đơ̆ng yua kơ tơ plih tŏ ‘mi kial păng jĭ hơ buh.

Thuem: Tơ blơ̆