VOV4. Bahnar - Kơsơ̆ năr 22/12, Thủ tướng Tĕh đak Phạm Minh Chính hăm khul bơ̆ jang kơ Khŭl kơdră chĕp pơgơ̆r Tĕh đak hlôi bơ̆ jang hăm kơdră chĕp pơgơ̆r dêh char Quảng Bình. Lăp đơ̆ng rŏng mơ̆ng nơ̆r tơgop đơ̆ng rim hơnĭh tơm, hơnĭh bơ̆ jang Trung ương păng kơdră chĕp pơgơ̆r dêh char Quảng Bình, Thủ tướng Phạm Minh Chính hôn bơnê dôm tơdrong jang mă dêh char Quảng Bình iŏk đei jơnei lơ̆m khei năr au ki.

Thủ tướng bơ̆ jang hăm kơdră chĕp pơgơ̆r dêh char Quảng Bình

Thủ tướng pơma hơdăh, sơnăm 2021, mă đơ̆ng tơ ƀơ̆p lơ tơdrong tơnap tap, tơdrong long mă lei Dơnŏ anĭh Đảng, Khŭl kơdră chĕp pơgơ̆r păng kon pơlei dêh char Quảng Bình hlôi hơdrin, iŏk đei jơnei hơ iă. Thủ tướng pơma hơdăh, sơnăm 2022 jing sơnăm tôch gĭt kăl vă jang kiơ̆ Tơdrong tơchơ̆t Pơm lêh hop akŏm mă XIII păng pơm lêh hop akŏm Đảng rim hơnĭh. Tơdrong tơm ‘nŏh kăl atŏk tơ iung kơ jăp, atŏk tơ iung lang să trŭh hloi sơđơ̆ng ‘lơ̆ng hơ iă ăn tơdrong erĭh sa, mŭk drăm kơ kon pơlei, kăl sơđơ̆ng chĭnh trĭ, kăl sơđơ̆ng vei lăng tĕh đak păng ‘moi kiơ̆ dôm tơdrong đei hơ iă git kăl. Thủ tướng athei Quảng Bình dăr lăng kơ jăp, tĕnh koăng jang keh đang ƀet bơ̆ng vaccine jrŭm mă 2 ăn bơngai đơ̆ng 18 sơnăm lơ̆m khei 12, jang keh đang ƀet bơ̆ng jrŭm mă 3 lơ̆m khei năr blŭng sơnăm 2022.

Tơblơ̆ nơ̆r: Amazưt