VOV4.Bahnar - Kơ sơ̆ ‘năr 11/7, Thủ tướng Phạm Minh Chính kŭm hăm khŭl bơ̆ jang Khŭl kơ dră teh đak đei jơ bơ̆ jang hăm kơ dră chĕp kơ̆l pơ lei tơm Hồ Chí Minh păng năm hơ len lăng tơ drong jang tang găn jĭ tơ̆ pơ lei tơm Hồ Chí Minh. Pơ ma tơ̆ jơ bơ̆ jang Thủ tướng pơ ma hơ dăh, tơ drong jang kiơ̆ tơ drong tơ chơ̆t 16 hăm pơ lei tơm ‘noh jĭ 1 tơ drong jang mơ mat tat, mă lei truh dang ei sơ kơ̆t hơ dăh ‘nâu tơ̆ tơ chơ̆t trŏ ƀlep, drơ̆ng nơ̆r hlôh vao, băt hơ dăh tơ drong tơm ƀlep hơ nih. Thủ tướng lăng ‘lơ̆ng tơ drong pơ lei tơm Hồ Chí Minh jang kiơ̆ 1 ‘măng 2 tơ drong jang tang găn jĭ hai hơ tŏk tơ iung mŭk drăm tơ pôl hai.

Thủ tướng athei kăl hơ tŏk tơ drong jang gơ̆h, chă hơ len lăng tơ drong tơm pơm ăn dôm tơ drong ư̆h kơ ‘lơ̆ng vă hơ met pơ ‘lơ̆ng mư̆h tơ lĕch jang kiơ̆. Tơ gŭm hơ drol tang găn jĭ, vei lăng tơ drong arih sa kon pơ lei ‘noh jĭ kăl hloh, ‘nĕ kơ lê̆ kon pơ lei hơ yơ ư̆h kơ măh por sŏng, hơ băn ao hrŭk, tang găn tôch ai bơ ngai lôch. Thủ tướng tơ tă, đei ƀôh đơ̆ng jĭ hơ buh ‘noh tam mă đei ƀôh, yua thoi noh ƀơ̆t tơ lĕch jang kiơ̆ athei lăng kiơ̆ păng pơ yom tơ drong yan âu, jang răh hlôh vao răh.

Thuem: Tơ blơ̆