VOV4.Bahnar - Sơng iŏk nơ̆r krao hơvơn đơ̆ng Kơdră chĕp pơgơ̆r, Kơdră vei lăng Grup jang Nikkei Tsuyoshi Hasebe, Thủ tướng Tĕh đak Phạm Minh Chính gô vang năm hop akŏm apŭng plĕnh tĕh găh “Đunh đai tai sơnăm châu Á” ‘măng mă 26 kơ yuơ Nikkei pơgơ̆r kiơ̆ trong pơgơ̆r trư̆k tuyên đơ̆ng năr 20-21/5/2021.

Đei pơgơ̆r nhen lĕ hơnơ̆ng rim sơnăm đơ̆ng sơnăm 1995 (lăp hơdrô̆ sơnăm 2020 kơ yuơ jĭ Covid-19 ư̆h pơgơ̆r), Hop akŏm ‘nŏh minh tơdrong pơgơ̆r hop akŏm apŭng plĕnh tĕh gĭt kăl hlŏh, akŏm lơ kơdră chĕp pơgơ̆r chĭnh trĭ, mŭk drăm păng rim kơdră joăt jang đơ̆ng tơring châu Á-Thái Bình Dương pơma tơbăt nơ̆r tơgop găh rim tơdrong lơ̆m tơring păng hơnăp jang kơ châu Á lơ̆m apŭng plĕnh tĕh. Hăm hơnăn “Hơlen trong iung jang lăp đơ̆ng rŏng jĭ hơbŭh Covid-19: Hơnăp jang kơ châu Á lơ̆m tơdrong hơmet pơ ‘lơ̆ng plei tĕh”, Hop akŏm ‘măng mă au đei vang năm đơ̆ng lơ kơră chĕp pơgơ̆r tơ̆ châu Á. Tơ̆ Hop akŏm, rim kơdră chĕp pơgơ̆r păng bơngai joăt jang gô pơma dơnŭh găh tơdrong châu Á rŏ năng kĕ yak mơ̆t lơ̆m chăl ‘nao lơ liơ lơ̆m khei ‘năr đei tơdrong mơmat tat nhen hrei au.

Tơblơ̆ nơ̆r: Amazưt