VOV4.Bahnar - Thủ tướng Phạm Minh Chính gơih kơ thơ hơ iă ƀlep ƀât ƀok Kishida Fumio đei pôk pơm Thủ tướng mă 100 kơ Nhật Bản. Kơ dră tơm jang tơ bôl Bùi Thanh Sơn kŭm gơih kơ thơ hơ iă kơ ƀok Motegi Toshimitsu đei pôk pơm Kơ dră tơm jang tơ bôl Nhật Bản.

Tơl nơ̆r apinh ăn bơ ngai chih tơ drong kơ tơ̆ng ang găh tơ drong Nhật Bản đei Thủ tướng ‘nao, Bơ ngai chă pơ ma tơ lĕch nơ̆r ăn Anih tơm jang tơ bôl Lê Thị Thu Hằng ăn tơ băt: “Việt Nam hơ iă ăn ƀok Kishida Fumio đei pôk pơm Thủ tướng mă 100 kơ Nhật Bản. Nhôn lui, hăm tơ drong chĕp kơ̆l đơ̆ng Thủ tướng Kishida Fumio, tĕh đak Nhật Bản hơ nơ̆ng jang tŏk hơ nŭk hơ noa, kon pơ lei roi đunh roi hiôk chơt.

Việt Nam năng kăl tơ drong pơ vei jang hơ doi ‘lơ̆ng hơ iă hăm Nhật Bản păng hơ pơi ‘mĕh jang hơ doi kơ jăp hăm Thủ tướng păng Khul kơ dră ‘nao kơ Nhật Bản vă hơ nhăk tơ drong pơ vei jang hơ doi gĭt kăl Việt Nam – Nhật Bản tŏk ‘lơ̆ng hlŏh dơ̆ng, yoa tơ drong đei yoa kơ kon pơ lei 2 tĕh đak, yoa tơ drong rơ ngei, sơ đơ̆ng, jang hơ doi păng jang tŏk tơ̆ tơ ring păng lơ̆m apŭng plenh tĕh".

Dơ̆ng: Tơ blơ̆