VOV4.Bahnar - Ƀlep lơ̆m năr Noel sơnăm 2021, kơsơ̆ năr 17/12, Thủ tướng Tĕh đak Phạm Minh Chính hlôi năm ngôi, hmach chơt hơ iă Noel 2021 rim ƀok soi, kon pơlei kon khop tơ̆ dêh char Bà Rịa-Vùng Tàu.

Năm tơmang Hnam khop Long Hương păng năm tơmang Hnam khop tơm dêh char Bà Rịa Vũng Tàu, Thủ tướng Phạm Minh Chính ‘mĕh vă kon pơlei kon khop hơnơ̆ng pơm kiơ̆ kơ jăp jơhngơ̆m đon “ Yom Jêsu, ‘mêm kơ eng Tĕh đak” pơm kiơ̆ kơ jăp trong bơ̆ jang, khôi luơ̆t kơ Đảng păng tĕh đak, hơdrin jang sa vă đei tơdrong erĭh sa phĭ tơtŏ dơnŏ ‘lơ̆ng dơ̆ng kơ jăp, hơnŭk hơnoa, tơgoăt tơgoăl, ‘mêm kơ eng dĭh băl, tơgŭm djru dĭh băl, tơgop tơ iung pơjing pơlei pơla, tĕh đak roi năr roi atŏk tơ iung. Thủ tướng jei athei khŭl kơdră đảng, kơdră chĕp pơgơ̆r tơring lăng kơ jăp tơdrong ƀet vaccine păng athei ƀok soi chă pơrô̆, hơvơn kon khop pơma hơdrô̆ păng kon pơlei pơma atŭm hơdrin vang ƀet vaccine, kơ yuơ jơhngơ̆m pran jăng grăng akau ăn kơ dĭh, ŭnh hnam păng kon pơlei. Adoi, jang kiơ̆ kơ jăp rim trong jang tang găn jĭ hơbŭh nhen 5K, atŏk kơtang jơhngơ̆m đon kơchăng.

Tơblơ̆ nơ̆r: Amazưt