VOV4.Bahnar - Thủ tướng Phạm Minh Chính ‘nao pơ gơ̆r hop akŏm Khŭl chĕp kơ̆l pơ gơ̆r teh đak găh tơ drong jang pơ gơ̆r pôk rơ̆ih Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei tơ̆ rim tơ ring jăl jang 2021-2026 lơ̆m khei ‘năr jĭ COVID-19 đei ƀôh tôch kơ krê hơ mơt. Dôm nơ̆r tơ gop tơ̆ ‘măng hop akŏm adoi drơ̆ng nơ̆r kăl kơ đei trong jang mă hơ dăh hăm rim tơ ring lê̆ đei ƀôh jĭ COVID-19 hơ drol, lơ̆m păng đơ̆ng rŏng năr pôk rơ̆ih. Anih tơm vei lăng găh tơ drong jang pơ gang hlôi tơ lĕch trong jang găh tơ drong jang pơ gang pơ yua ăn pôk rơ̆ih, akŏm 3 tơ drong tơm: Pơm rơ goh cham char păng vei sơ đơ̆ng ‘lơ̆ng COVID-19; vei rơ goh tơ mam sa; tơ drong jang kâp kư̆u păng 1,2 tơ drong gĭt kăl. Anih tơm vei lăng găh tơ drong jang pơ gang hlôi pơ gơ̆r pơ hrăm ăn kơ rim anih jang đơ̆ng apŭng truh dêh char, hơ dai hăm ‘noh athei rim dêh char hơ tŏk loi dơ̆ng hơ len lăng, dăr lăng.

Thủ tướng Phạm Minh Chính pơ gơ̆r ‘măng hop akŏm găh tơ drong jang pơ gơ̆r pôk rơ̆ih

Đơ̆ng rŏng ‘măng hop akŏm âu, Anih tơm vei lăng găh tơ drong jang pơ gang jang hơ dai hăm Anih tơm Nội vụ vă đei trong pơ tho hơ dăh, mă loi ‘noh jĭ trong jang hăm tơ drong đei jĭ, bơ ngai jĭ tŏk bŏk hơ met. Dôm nơ̆r tơ gop tơ̆ ‘măng hop akŏm kŭm tơ lĕch, athei pơ gơ̆r kiơ̆ jơ, dơ̆ng hơ tăih băl, gom muh măt păng hơ nih rơ hơi. Kơ thŭng tăh kơ phiê̆u tơ̆ tơ ring đei jĭ kăl kơ prŭih pơ gang hơ drol kơ pơ gơ̆r hơ len lăng kơ phiê̆u. Chih iŏk dôm nơ̆r tơ gop, pơ tôch ‘măng hop akŏm, Thủ tướng Phạm Minh Chính pơ ma hơ dăh tơ drong vei kơ jăp tơ drong gơ̆h jang kiơ̆ tơ drong hơ găt vă pơ gơ̆r bơ̆ jang kiơ̆ ‘lơ̆ng ‘măng pôk rơ̆ih.

Thuem: Tơ blơ̆