VOV4.Bahnar - Pơ gê brei (1/7), tơ̆ Anih jang kơ Khul kơ dră tĕh đak, Thủ tướng Phạm Minh Chính pơ gơ̆r hop akŏm Khul kơ dră tĕh đak khei 6. Lơ̆m jơ hôp, Khul kơ dră tĕh đak mơ̆ng păng pơ ma nuh 6 hla ar chih tơ roi găh dôm tơ drong đei: Tơ drong jang mŭk drăm tơ pôl khei 6 păng 6 khei blŭng sơ năm 2021; Hơ len năng tơ drong jang chĕp kơ̆l pơ gơ̆r 6 khei blŭng sơ năm 2021;

Jơ bơ̆ jang lơ̆m Hop akŏm Khul kơ dră tĕh đak khei 6

Tơ drong jang kiơ̆ dôm trong jang tơm hơ met ming anih tĕch mơ dro, hơ tŏk kơ sư̆k pơ jei ăn tĕh đak 6 khei blŭng păng tơ drong jang tơm lơ̆m 6 khei hơ tuch sơ năm 2021; Tơ drong kăt tơ jur, pơm hiôk hian ƀiơ̆ dôm tơ drong hơ găt ƀơm truh tơ drong tĕch mơ dro 6 khei blŭng sơ năm păng tơ drong vă jang, trong jang tơm 6 khei hơ tuch sơ năm 2021 kŭm hăm 1,2 tơ drong kăl nai hai.

Pơ ma lơ̆m hop akŏm, Thủ tướng Phạm Minh Chính akhan, hop akŏm ‘măng mă âu tôch gĭt kăl, hơ len năng mŭk drăm, tơ pôl, tơ drong pơ gơ̆r đơ̆ng Khul kơ dră tĕh đak lơ̆m 6 khei blŭng sơ năm păng pơ ma găh dôm tơ drong vă jang lơ̆m 6 khei hơ tuch sơ năm 2021. Atŭm hăm ‘nŏh pơ ma truh lơ tơ drong gĭt kăl hrei ‘nâu nhen tang găn COVID-19, hơ met pơ ‘lơ̆ng mơ mat tat, tưk tơ iung tơ drong jang xa, tĕch mơ dro.

Dơ̆ng: Tơ blơ̆