VOV4.Bahnar - Kơ sơ̆ 24/10, Thủ tướng Phạm Minh Chính pơ gơ̆r hop akŏm Khul chĕp kơ̆l pơ gơ̆r kơ Khul kơ dră tĕh đak tơ gop nơ̆r găh Tơ drong vă jang atŏk tơ iung ming mŭk drăm, tơ pôl. Thủ tướng athei tơ drong vă jang âu gơ̆h bơ̆ jang tơ̆ lơ tơ ring, jĭ tơ drong jang tih, khei ‘năr bơ̆ jang kiơ̆ đunh, ‘moi kiơ̆ tơ drong tơ chơ̆t đơ̆ng Hop akŏm mă 13 kơ Đảng, ‘moi kiơ̆ trong jang atŏk tơ iung mŭk drăm, tơ pôl 5 sơ năm 2021-2025 păng Tơ dỏng jang atŏk tơ iung mŭk drăm, tơ pôl sơ năm 2022.

Thủ tướng athei hơ len năng mă brĕ, tơ dra mă trŏ, lăp hăm yăn âu, rơ đăh rơ đong, trŏ ƀlep, athei lăng kiơ̆ kơ sô̆ chih jô̆ mă tơ găl. Tơ drong jang athei akŏm rơih dôm tơ drong tơm gĭt kăl kiơ̆ trong: dôm trong jang găn pơ gang mă loi ‘nŏh hơ tŏk kơ sư̆k jang pơ gang pơ ma atŭm, lơ̆m nŏh athei tơ rĕk truh jang pơ gang tang găn jĭ, jang pơ gang tơ̆ tơ ring, vắc xin păng dôm trong hơ met jĭ; dôm tơ drong vei sơ đơ̆ng arih xa tơ pôl, tơ drong tơ gŭm vă atŏk tơ iung ming anih tĕch mơ dro, HTX; pơm ‘lơ̆ng ăn trong jang jơ̆p lơ̆m tĕh đak, găn lê̆ kơ jă tơ mam tŏk…

Thủ tướng athei Anih jang kơ pal pơ gơ̆r chih iŏk nơ̆r pơ ma đơ̆ng dôm bơ ngai tang măt păng hơ nơ̆ng hơ len năng nơ̆r pơ ma đơ̆ng dôm anih jang đei ƀơm truh găh Tơ drong vă jang atŏk tơ iung ming mŭk drăm, tơ pôl, jăh tơ roi ăn dôm anih jang kơ pal set hơ len hrôih hlŏh, kăl loi athei đei yoa, gơ̆h jang kiơ̆, iŏk đei tơ drong drơ̆ng nơ̆r tơ gŭm đơ̆ng tơ pôl.

Dơ̆ng: Tơ blơ̆