VOV4.Bahnar - Pơ gê brei 28/9, Thủ tướng teh đak Phạm Minh Chính hlôi pơ gơ̆r Hop akŏm trực tuyến lơ̆m teh đak Khŭl kơ dră teh đak hăm rim anih tơm, anih jang, anih bơ̆ jang Trung ương păng rim tơ ring găh pơ trŭt tơ lĕch jên tơ mơ̆t jang kơ teh đak. Kiơ̆ tơ roi tơ băt, trong tơ lĕch jang tơ mơ̆t jên jang kơ teh đak sơ năm 2021 đei Thủ tướng teh đak pơ jao 1 ‘măng ăn kơ rim anih tơm, anih bơ̆ jang trung ương păng tơ ring đơ̆ng hơ tuch sơ năm 2020 hăm akŏp kơ sô̆ jên ‘noh 461.300 ti hlak jên. Truh dang ei, hlôi klăih song, pơ jao hơ dăh ăn kơ rim tơ drong jang đei vă jê̆ 88%.

Thủ tướng Phạm Minh Chính pơ gơ̆r Hop akŏm trực tuyến lơ̆m teh đak găh pơ trŭt tơ lĕch jên tơ mơ̆t jang teh đak

Pơ ma tơ̆ hop akŏm, Thủ tướng Phạm Minh Chính tơ băt: hop akŏm âu vă hơ len lăng pơ tôch, tơ blang hơ dăh dôm tơ drong kiơ hlôi jang đei, tam mă jang đei; tơ blang hơ dăh tơ drong tơm pơm ăn, mă loi ‘noh jĭ tơ drong tơm pơm ăn pơ hơi; đơ̆ng noh tơ lĕch ăn tơ drong hơ găt, trong jang pơ trŭt tơ lĕch jên tơ mơ̆t jang kơ teh đak tơ̆ hơ năp kơnh. Thủ tướng athei rim bơ ngai tang măt akŏm pơ ma dơ nuh vă pơ trŭt tơ lĕch jên jang, iŏk yua jơ nei jên tơ mơ̆t jang kơ teh đak, tơ gop hơ tŏk tơ iung mŭk drăm - tơ pôl sơ năm 2021 păng pơm tơ drong ‘lơ̆ng ăn hơ tŏk tơ iung mŭk drăm - tơ pôl sơ năm 2022.

Thuem: Tơ blơ̆