VOV4.Bahnar - Kơ sơ̆ 2/7, tơ̆ Anih pơih pơ dăh kơ Khul kơ dră tĕh đak, Thủ tướng Phạm Minh Chính pơ gơ̆r hop akŏm trư̆k tuyê̆n Khul kơ dră tĕh đak hăm dôm tơ ring chă hơ len năng tơ drong jang mŭk drăm, tơ pôl 6 khei blŭng sơ năm păng trong jang, tơ drong vă jang 6 khei hơ tuch sơ năm 2021, vă pơm ‘lơ̆ng bơ̆ jang đei 2 tơ drong jang tơm, tang găn jĭ hai, jang atŏk tơ iung mŭk drăm tơ pôl hai.

Pơ ma ƀât blŭng hop akŏm, Thủ tướng Phạm Minh Chính athei, dôm bơ ngai tang măt pơ ma kơ đĕh, pơ ma tơ păt tơ drong vă gơ̆h tơ lĕch đei trong jang, tơ drong vă jang lăp ‘lơ̆ng. Hăm jơ hngâm đon roi mơ mat roi adrin, akŏm jơ hngâm, vei kơ jăp tơ drong hơ găt bơ̆ jang, akŏm đon rơ gei đơ̆ng tơ pôl, đơ̆ng nŏh lăng kiơ̆ tơ̆ yăn âu vă tơ lĕch dôm tơ drong vă jang, trong jang lăp ‘lơ̆ng, pơ gơ̆r jang thoi yơ vă gơ̆h đei yoa ‘lơ̆ng hlŏh.

Đơ̆ng rŏng kơ mơ̆ng hla ar tơ roi hơ len năng tơ drong jang mŭk drăm, tơ pôl 6 khei blŭng sơ năm păng trong jang, tơ drong vă jang 6 khei hơ tuch sơ năm 2021, dôm bơ ngai tang măt pơ ma nuh tôch rơ đăh găh dôm tơ drong jang đei, dôm tơ drong mơ mat tat, hơ met pơ ‘lơ̆ng păng chih iŏk dôm tơ drong kăl. Găh trong vă jang tơ̆ hơ năp kơnh, Thủ tướng pơ ma hơ dăh, khŏm bơ̆ jang đei 2 tơ drong jang tơm păng 2 trong jang tŏk mŭk drăm đơ̆ng 6%-6,5%.

Dơ̆ng: Tơ blơ̆