VOV4.Bahnar - Kơ sơ̆ ‘năr 16/12, tơ̆ Anih jang Khŭl kơ dră teh đak, Thủ tướng Phạm Minh Chính - Kơ dră Anih pơ gơ̆r jang kơ teh đak tang găn ăn jĭ Covid-19 pơ gơ̆r ‘măng hop akŏm trực tuyến hăm 63 dêh char, pơ lei tơm vă hơ len lăng tơ drong păng tơ lĕch trong jang hơ dăh vă  tơ jur kơ sô̆ bơ ngai tơ plih jĭ ăl, lôch, tŭn hrĕnh tơ drong ƀet bơ̆ng, hơ tŏk loi dơ̆ng tơ drong jang pơ gang tang găn hiă păng jang pơ gang tơ ring. ‘Nâu jĭ ‘măng hop akŏm đei pơ gơ̆r lơ̆m khei ‘năr pơ rang tơ plih Omicron đei ƀôh mă WHO khan lê̆ hơ drol tơ poh lanh hrĕnh, yua thoi noh krao hơ vơn apŭng plĕnh teh hơ nơ̆ng kơ chăng, ưh kơ gơh pơm pơ hơi, ưh kơ ‘lơ ‘lŏ. Thủ tướng Phạm Minh Chính pơ ma hơ dăh, dang ei, tơ drong lơ̆m teh đak đei ƀôh oei krê hơ mơt; tơ̆ 1,2 dêh char, kơ sô̆ bơ ngai lôch tam mă vei lăng đei; yua thoi noh, rim tơ ring, anih jang kăl hơ nơ̆ng pơ ma dơ nuh, hơ len lăng lơ̆m teh đak vă tơ lĕch ăn rim trong jang hơ dăh, ‘lơ̆ng vă hơ drin tang găn dôm bơ ngai jĭ lơ̆m tơ pôl, mă loi ‘noh jĭ dôm bơ ngai tơ plih jĭ ăl, vei lăng mă đei dôm bơ ngai lôch. Kiơ̆ kơ Thủ tướng Phạm Minh Chính, kăl akŏm pơ ma dơ nuh chă trong jang hơ tŏk hrĕnh ƀet bơ̆ng, pơ trŭt ƀet vaccine ăn hơ ioh đơ̆ng 12 truh 18 sơ năm vă kơ đe oh năm hŏk hmă hơ lơ̆k dơ̆ng. Rim dêh char pơ lei tơm jang kiơ̆ rim trong jang tang găn jĭ mă lăp, vei lăng pơm tơ lĕch, tĕch mơ dro.

Thuem: Tơ blơ̆