VOV4.Bahnar - Kơ sơ̆ ‘năr 25/5, Thủ tướng Phạm Minh Chính pơ ma đam hăm điên thoăi hăm Thủ tướng Australia Scott Morrison. Lơ̆m jơ pơ ma nuh, Thủ tướng Phạm Minh Chính pơ ma hơ dăh vă jang hơ doi kơ jăp hăm Thủ tướng Scott Morrison khŏm hơ nhăk tơ drong pơ vei jang hơ doi gĭt kăl Việt Nam - Australia roi đunh roi đei yoa, ‘lơ̆ng păng lăp hăm yăn âu.

Thủ tướng Phạm Minh Chính pơ ma đam hăm Thủ tướng Australia

Ƀar Thủ tướng drơ̆ng nơ̆r tơ lĕch tơ drong hơ găt kơ jung ƀiơ̆ lơ̆m tơ drong adrin hơ tŏk jên tơ mât jang, tĕch mơ dro 2 pang, năm truh tơ drong jang tŏk dơ̆ng ‘lơ̆ng hơ iă đơ̆ng rŏng kơ jĭ hơ buh, hrôih jang kĕh păng kĭ pơ kăp Trong hơ tŏk tơ drong jang hơ doi mŭk drăm, tưk tơ iung tơ drong jang hơ doi khoa hŏk kơ măy kơ mŏk, tơ lĕch jang đei yoa ‘lơ̆ng “Tơ drong jang hơ doi ‘nao Việt Nam - Australia đơ̆ng 2022-2025”.

Găh tơ drong đak dơ sĭ Biển Đông, 2 ‘nu kơ dră chĕp kơ̆l pơ ma hơ dăh tơ drong gĭt kăl đơ̆ng vei kơ jăp tơ drong rơ ngei, sơ đơ̆ng ‘lơ̆ng păng hiôk hian tơ̆ trong đak dơ sĭ păng trong gre păr, sek tơ lang dôm tơ drong tơ gar băl kiơ̆ khôi luơ̆t apŭng plenh tĕh.

Dơ̆ng: Tơ blơ̆