VOV4.Bahnar - Kơ sơ̆ (19/8), Thủ tướng Phạm Minh Chính pơ ma điên thoăi hăm Kơ dră chĕp kơ̆m Grŭp jang AstraZeneca Pascal Soriot. Lơ̆m jơ pơ ma nuh, Thủ tướng pơ ma hơ dăh vaccine AstraZeneca jĭ 1 lơ̆m dôm kơ loăi vaccine đei yoa lơ hlŏh lơ̆m apŭng plenh tĕh, iŏk đei hlŏh 65% kơ sô̆ vaccine mă Việt Nam hlôi iŏk đei truh dang ei, tơ gop gĭt kăl lơ̆m tơ drong adrin tang găn jĭ lơ̆m plei tĕh păng tơ̆ Việt Nam.

Thủ tướng tĕh đak bơ̆n Phạm Minh Chính

Ƀât mă jĭ COVID-19 oei tơ pŏh tôch hơ mơt, Thủ tướng athei Kơ dră chĕp kơ̆l AstraZeneca tơ rĕk truh nơ̆r pơ tho hơ tŏk hrĕnh tơ drong pơ jao vaccine ăn Việt Nam, tơ̆ hơ năp dang ei ‘nŏh jang kĕh nơ̆r pơ kăp pơ jao 8 triu kơ liêu lơ̆m khei 8, atŭm hăm ‘nŏh hơ tŏk tơ drong adrin jang kĕh hla ar pơ kăp pơ truh dơ̆ng vaccine ăn Việt Nam kơ tă lơ̆m khei 9 sơ năm 2021 păng trong jang truh sơ hơ tuch sơ năm 2021.

Thủ tướng athei păng hơ pơi ‘mĕh AstraZeneca hơ len năng, pơ ma nuh hăm dôm tĕh đak nai vă gơ̆h tŏk iŏk, asong kơ sô̆ vaccine tam mă iŏk yoa dang ei; atŭm hăm ‘nŏh tơ lĕch hla ar pơ kăp vaccine ‘măn ăn hơ iŏh păng bơ ngai hơ la kơ 18 sơ năm, dôm bơ ngai ƀônh tơ pŏh jĭ păng bơ ngai đei jĭ lơ̆m hơ kâu adrol bơih.

Dơ̆ng: Tơ blơ̆