VOV4.Bahnar - Kơ sơ̆ ‘năr 22/6/2021, Thủ tướng Phạm Minh Chính pơ ma điên thoăi hăm Thủ tướng Đức Angela Merkel. Lơ̆m jơ pơ ma nuh, 2 Thủ tướng tơ ƀôh đon hơ iă găh dôm tơ drong jơ nei đơ̆ng jang hơ doi kơ jăp ‘lơ̆ng kơ 2 tĕh đak lơ̆m hlŏh 45 sơ năm âu ki iŏk đơ̆ng năr pơ jing tơ drong pơ vei jang tơ bôl. Thủ tướng Phạm Minh Chính pơ ma hơ dăh, Việt Nam ling lang năng kăl tơ drong pơ vei jang hơ doi gĭt kăl hăm Đức, hơ pơi ‘mĕh pơm hơ tŏk hlŏh dơ̆ng tơ drong pơ vei ‘lơ̆ng hơ iă păng lui băl đơ̆ng 2 tĕh đak găh rim tơ drong.

Thủ tướng Phạm Minh Chính

Thủ tướng Angela Merkel akhan Việt Nam jĭ tĕh đak jang hơ doi gĭt kăl lơ̆m trong jang tơ bôl đơ̆ng Đức tơ̆ tơ ring, năng kăl tơ drong pơ vei jang hơ doi Việt Nam - Đức păng pơ ma hơ dăh 2 tĕh đak oei dơ̆ng tơ̆ hơ năp lơ tơ drong ‘lơ̆ng păng đon hơ mĕng tih, kăl jang tŏk pran hlŏh dơ̆ng. Vă hơ met kơ jăp păng hơ tŏk tơ drong pơ vei jang hơ doi lơ tơ drong ‘lơ̆ng hơ iă đơ̆ng 2 tĕh đak, 2 păh drơ̆ng nơ̆r vă pơ gơ̆r dơ̆ng ăn khul grŭp tơ ƀâp, pơ ma nuh păng hơ met kơ jăp dôm trong jang hơ doi, lơ̆m nŏh năng kăl pơm hơ tŏk tơ drong đei yoa đơ̆ng Anih jang atŭm găh tơ drong jang hơ doi mŭk drăm Việt Nam - Đức.

Dơ̆ng: Tơ blơ̆