VOV4.Bahnar - Kơ sơ̆ (6/4) tơ̆ Anĭh jang kơ Khul kơ dră tĕh đak, ƀlep ƀât ƀok Phạm Minh Chính đei pôk pơm Thủ tướng tĕh đak CHXHCN Việt Nam, Thủ tướng tĕh đak CHDCND Lào Phankham Viphavanh păng Thủ tướng tĕh đak Campuchia Samdech Techo Hun Sen krao điên thoăi pơ truh nơ̆r hơ iă.

Thủ tướng Phạm Minh Chính

Thủ tướng Lào Phankham Viphavanh păng Thủ tướng Campuchia Hun Sen tơ ƀôh đon lui, hăm tơ drong lui tôch kơ jung đơ̆ng Đảng, Tĕh đak păng kon pơ lei Việt Nam, Thủ tướng Phạm Minh Chính gô jang đang ‘lơ̆ng hơ năp jang đei pơ jao, chĕp kơ̆l pơ gơ̆r Khul kơ dră tĕh đak Việt Nam iŏk đei lơ tơ drong jơ nei ‘nao lơ̆m tơ drong pơ jing păng atŏk tơ iung tĕh đak, hơ nơ̆ng pơm hơ tŏk hơ năp jang, anih dơ̆ng đơ̆ng Việt Nam tơ̆ tơ ring păng lơ̆m apŭng plenh tĕh.

Thủ tướng Phạm Minh Chính păng thủ tướng Lào Phankham Viphavanh drơ̆ng nơ̆r hơ tŏk hlŏh dơ̆ng tơ drong đei yoa đơ̆ng jang hơ doi kơ plăh 2 khul kơ dră tĕh đak, bơ̆ jang ‘lơ̆ng dôm tơ drong drơ̆ng nơ̆r iŏk đei lơ̆m Hop akŏm Anĭh jang atŭm kơ 2 Khul kơ dră tĕh đak Việt Nam - Lào ‘măng mă 43. Thủ tướng Phạm Minh Chính păng Thủ tướng Campuchia Hun Sen kŭm drơ̆ng nơ̆r hơ nơ̆ng jang hơ doi kơ jăp lơ̆m dôm khul jang lơ pang, kŭm hăm dôm tĕh đak nai vei kơ jăp tơ drong tơ guăt 1 ƀơ̆r đon păng tưk tơ iung hơ năp jang tơm đơ̆ng ASEAN.

Dơ̆ng: Tơ blơ̆