VOV4.Bahnar - ‘Năr 04/11(kiơ̆ jơ tơ̆ tơ ring), lơ̆m ‘măng năm hơ pong tơ̆ tĕh đak Cộng hòa Phalăng, Thủ tướng Phạm Minh Chính hlôi pơ ma nuh hăm Kơ dră tơm Phalăng Emmanuel Macron. 

Thủ tướng Phạm Minh Chính păng Kơ dră tơm Phalăng Emmanuel Macron

Tơ̆ jơ pơ ma nuh, 2 ‘nu kơ dră pơ ma truh tơ drong kăl hơ met kơ jăp hlŏh dơ̆ng tơ drong jang hơ doi găh mŭk drăm, tĕch mơ dro păng tơ mât jên jang lơ̆m tơ drong pơ vei jang hơ doi gĭt kăl Việt Nam - Phalăng, drơ̆ng nơ̆r ăn dôm trong vă jang hơ doi tơ̆ hơ năp kơnh vă pơ jing tơ drong ‘lơ̆ng ăn tơ drong tĕch mơ dro đơ̆ng 2 tĕh đak, tơ gŭm ăn dôm anih tĕch mơ dro, tơ mam drăm đơ̆ng 2 tĕh đak gơ̆h mât truh tơ̆ anih tĕch mơ dro băl;

drơ̆ng nơ̆r hơ tŏk dôm tơ drong jang hơ doi găh dôm tơ drong kăl nhen pơm trong, man anih jang, choh jang xa, vei lăng cham char, unh hơ yuh. 2 păh drơ̆ng nơ̆r tơ lĕch jang păng tơ gĕch iŏk mă ‘lơ̆ng Tơ drong tơ chơ̆t tĕch mơ dro hiôk hian Việt Nam - EU (EVFTA) atŭm hăm ‘nŏh hơ tŏk hrĕnh tơ drong kĭ pơ kăp Tơ gŭm vei lăng jên tơ mât jang Việt Nam - EU (EVIPA), pơ jing jơ hngâm pran ăn tơ drong jang hơ doi mŭk drăm, tĕch mơ dro păng tơ mât jên jang đơ̆ng Việt Nam hăm Phalăng păng EU.

Dơ̆ng: Tơ blơ̆