VOV4.Bahnar - Thủ tướng Phạm Minh Chính ‘nao pơ tôch ‘lơ̆ng hơ iă ‘măng năm Hop akŏm đe kơ dră chĕp kơ̆l ASEAN. Lơ̆m ‘năr 2 năr năm bơ̆ jang, Thủ tướng vang truh akŏm păng đei ƀai iung pơ ma tơ ƀôh nơ̆r đe kơ dră chĕp kơ̆l dôm tĕh đak ASEAN găh tơ drong Myanmar păng hơ năp jang đơ̆ng ASEAN.

Thủ tướng pơ ma hơ dăh, hăm hơ năp jang pơ lơh păng dang ei oei pơm Kơ dră Jơ nŭm vei lăng sơ đơ̆ng Liên Hợp Quốc lơ̆m khei 4/2021, Việt Nam adrin pơ jing tơ drong ‘lơ̆ng vă chă trong jang lăp hlŏh ăn tơ drong tơ̆ Myanmar. 

Thủ tướng athei dôm tĕh đak ASEAN jang hơ doi kơ jăp lơ̆m dôm hop akŏm kơ Liên Hợp Quốc kŭm hăm Việt Nam krao hơ vơn rim tĕh đak vang tơ gŭm ăn tơ drong adrin đơ̆ng ASEAN vă chă trong jang lăp 'lơ̆ng ăn Myanmar.

Lơ̆m 2 năr bơ̆ jang tơ̆ Indonesia, Thủ tướng oei đei lơ 'măng tơ ƀâp 2 pang hăm lơ kơ dră chĕp kơ̆l dôm tĕh đak ASEAN, hơ nơ̆ng tơ ƀôh um rup 'lơ̆ng hơ iă đơ̆ng Khul kơ dră 'nao kơ tĕh đak Việt Nam truh hăm kơ dră chĕp kơ̆l dôm tĕh đak lơ̆m tơ ring.

Dơ̆ng: Tơ blơ̆