VOV4.Bahnar  – Kơsơ̆ năr 24/5, tơ̆ anih jang Khul kơpal teh đak, Thủ tướng Phạm Minh Chính pơgơ̆r tơdrong hop akŏm hăm Anih juăt jang Khul kơpal teh đak găh tơdrong jang tang găn păng tơjră jĭ Covid-19.

Pơma ăh jơ hop akŏm, Thủ tướng ră hơdăh, giĕng âu ki pơrang hơbuh hli păng tơpoh tenh lang xă, mă kăl noh tơ̆ dôm anih jang kŏng ngĭp. Khul kơpal teh đak, Thủ tướng teh đak, Jơnŭm pơgơ̆r jang kơ teh đak găh tang găn păng tơjră jĭ Covid-19 hlôi pơgơ̆r kơjăp, đei dôm jăl kơpal tơ̆ tơring păng kon pơlei iŏk jang pran kơtang, hăm tơdrong pơkăp tơpuh lê̆ pơrang jĭ. Thủ tướng xơkơ̆t, tơdrong jang tang găn păng tơjră jĭ Covid-19 đei kĕ tang găn hlôi tơgop pơgơ̆r keh kong tơdrong pôk rơih bơngai jang tang măt ăn  Kuôk hô̆i jăl 15 păng bơngai jang tang măt lơ̆m Hô̆i đŏng kon pơlei jăl jang 2021-2026. Thủ tướng athei mong ƀiơ̆ jên huach ưh kơ kăl vă akŏm răt vaccine, hơvơn tơdrong tơgŭm trŏ ƀlep nai, pơjing jên mong vaccine. Dôm anih jang tơm, anih jang tơ̆ trung ương kăl tơchơ̆t pơjing jên mong vaccine kiơ̆ pơkăp chă hơvơn jơhngơ̆m pran đơ̆ng tôm kon pơlei, đơ̆ng anih jang mŭk drăm, rim anih jang, rim tơring, anih jang 'mêm bơnat kiơ̆ pơkăp hơdăh hơtŏ hơnơ̆ng găh tơgop, pơhuach păng iŏk yua.

Lan chih păng pơre nơ̆r