VOV4.Bahnar - Anih mong jên vaccine tang găn jĭ COVID-19 hlôi đei pơ jing vă mong akŏm jơ hngâm pran atŭm mĭnh jơ hngâm hăm Khul kơ dră tĕh đak vă gơ̆h đei vaccine hrôih hlŏh ăn kon pơ lei. Pơ ma lơ̆m lêh tơ băt, Thủ tướng Phạm Minh Chính akhan: “Nâu jĭ anih mong jên đơ̆ng jơ hngâm đon ‘mêm mơ nat, đơ̆ng tơ guăt 1 ƀơ̆r đon, đơ̆ng đon lui, đơ̆ng plei nuih băt ‘mêm băl vă đĭ đăng bơ̆n vang yak hlŏh mơ mat tat, tơ gop pơ jing 1 Việt Nam tang găn jĭ đei jơ nei ‘lơ̆ng”.

Thủ tướng Phạm Minh Chính truh pơm lêh tơ băt Anih mong jên vaccine tang găn jĭ Covid-19

Kiơ̆ đơ̆ng hơ met kon jên vă răt păng ƀet pơ gang ăn 75 triu ‘nu kon pơ lei, Việt Nam kăl đei 150 triu kơ liêu vaccine, hăm kơ sô̆ jên hlŏh 25 rơ bâu ti hlak jên. Yoa thoi nŏh, vă đei tôm jên răt vaccine ƀet ăn kon pơ lei kiơ̆ tơ drong hơ găt đei tơ lĕch. Tơ drong pơ jing Anih mong jên vaccine tang găn jĭ Covid-19 vă krao hơ vơn kon pơ lei, khul linh lơ̆m tĕh đak, kon pơ lei bơ̆n oei xa tơ̆ tĕh đak đe, dôm anih tĕch mơ dro, bơ ngai pơ dro, rim khul grŭp, rim bơ ngai lơ̆m păng ‘ngoăih kơ tĕh đak vang tơ gop, tơ gŭm ăn Anih mong jên vaccine tang găn jĭ COVID-19 hăm jơ hngâm đon ‘lơ̆ng păng đon jang tơ năp yoa jơ hngâm pran rim bơ ngai, yoa tơ pôl, yoa tĕh đak, hơ drĕch hơ drung păng hăm jơ hngâm đon tơ guăt hơ dai lơ̆m apŭng plenh tĕh, vang tang găn đĭ tơ drong jĭ.

Dơ̆ng: Tơ blơ̆