VOV4.Bahnar - Thủ tướng Phạm Minh Chính pơtruh kơthơ hơlêm, hôn bơnê kơtang dôm tơdrong tơgop đơ̆ng khŭl bơ̆ jang tang găn jĭ hơbŭh Covid-19. Dôm tơdrong tơgop ‘nŏh hlôi pơjing đei tơdrong ‘lơ̆ng hơ iă lang să lơ̆m ‘măng iung tơ jră tang găn jĭ hơbŭh. 

Thủ tướng Phạm Minh Chính hơlêm khŭl ƀok thây pơgang

Đảng, Tĕh đak tơgoăt iŏk, hôn bơnê dôm tơdrong tơgop tĭh tên đơ̆ng khŭl bơ̆ jang tang găn jĭ hơbŭh, mă kăl khŭl ƀok thây pơgang. Khei năr kơnh, tơdrong jĭ hơbŭh oei hơmơt tơt đĕch. Bơ̆n xơkơ̆t ‘nau gô jing ‘măng iung tơ jră đunh đai tai sơnăm, mơmat tat dơ̆ng. Thủ tướng ‘mĕh vă rim khŭl hơnơ̆ng tơ ƀô̆h hơdăh jơhngơ̆m đon bơ̆ jang đĭ jơhngơ̆m vă tơgŭm ăn kon pơlei. Bơ̆n đei jơhngơ̆m đon lui, tơdrong hơdrin kơtang, iung jang kơtang hlŏh dơ̆ng hăm lơ trong jang hrơ̆p mĭnh ‘măng, mĭnh nơ̆r ƀơ̆r đon vang tơgŭm djru đơ̆ng kon pơlei, ư̆h kơ jor bơ̆n gô tang găn jĭ.

Tơblơ̆ nơ̆r: Amazưt