VOV4.Bahnar - Kơ sơ̆ 30/9, tơ̆ Anih jang kơ Khul kơ dră tĕh đak, Thủ tướng Phạm Minh Chính sơng ƀok Gareth Ward, Bơ ngai tang măt ăn tĕh đak Anh păng Bắc Ai-len tơ̆ Việt Nam.

Thủ tướng Phạm Minh Chính sơng bơ ngai tang măt ăn tĕh đak Anh păng Bắc Ai-len tơ̆ Việt Nam

Thủ tướng pơ ma hơ dăh Anh jĭ 1 lơ̆m dôm tĕh đak jang hơ doi mŭk drăm tôch gĭt kăl kơ Việt Nam tơ̆ châu Âu; 2 tĕh đak athei jang hơ doi kơ jăp hlŏh dơ̆ng vă iŏk yoa dôm tơ drong ‘lơ̆ng đơ̆ng Tơ drong tơ chơ̆t tĕch mơ dro hiôk hian 2 pang, athei Anh pơih xă hlŏh dơ̆ng anih tĕch mơ dro ăn tơ mam đơ̆ng Việt Nam, atŭm hăm ‘nŏh pơ lung anih tĕch mơ dro Anh tơ mât jên jang tơ̆ Việt Nam, mă loi lơ̆m dôm tơ drong pran ‘lơ̆ng găh jên hu – anih mong jên, jang đak dâu, unh hơ yuh rơ gŏh, mŭk drăm kơ sô̆, kơ măy pơm tơ mam.

Ƀlep ƀât ‘măng mă âu, Thủ tướng Phạm Minh Chính pơ truh nơ̆r bơ nê hăm Khul kơ dră păng kon pơ lei Anh hlôi tơ gŭm 415 rơ bâu kơ liêu vắc-xin AstraZeneca ăn Việt Nam. Thủ tướng hơ pơi ‘mĕh 2 tĕh đak hơ nơ̆ng hơ tŏk tơ drong jang hơ doi găh pơ gang, mă loi jĭ pơ tho jang pơ gang păng atŏk tơ iung kơ măy pơm pơ gang; athei Anh hơ nơ̆ng tơ gŭm vắc-xin, tơ mam kơ măy kơ mŏk jang pơ gang, set hơ len pơ jao kơ măy pơm vắc-xin, pơ truh pơ gang hơ met jĭ Covid-19.

Dơ̆ng: Tơ blơ̆