VOV4.Bahnar - Pơ gê ‘năr 29/7, tơ̆ anih jang kơ Khŭl kơ dră teh đak, Thủ tướng teh đak Phạm Minh Chính hlôi sơng Kơ dră tang măt Cộng hòa Cuba Orlando Nicolás Hernández Guillén truh kơ kuh pơ ma dơ nuh. Tơ̆ jơ tơ ƀơ̆p, lơ̆m tơ drong jang tơ bôl hiôk hơ iă, tơ păt, Thủ tướng Phạm Minh Chính hmach chơt hơ iă Kơ dră tang măt Orlando Nicolás Hernández Guillén hlôi pơ truh kơ thơ teh đak ăn Kơ dră teh đak lơ̆m ‘năr 13/7 păng pơ ma hơ dăh Khŭl kơ dră teh đak gô bơ ngơ̆t truh pơ gơ̆r rim Anih tơm, anih jang tơ gŭm, pơm tơ drong hiôk vă Kơ dră tang măt jang đang ‘lơ̆ng hơ năp jang tơ̆ Việt Nam.

Jơ sơng pơ ma dơ nuh

Thủ tướng Phạm Minh Chính pơ ma hơ dăh Việt Nam lăng kăl hloh tơ drong pơ vei tơ bôl hơ dai, lui ngeh hăm Cuba, đei kơ dră Hồ Chí Minh păng kơ dră chĕp kơ̆l Fidel Castro tơ lĕch ăn păng lơ jơ hnơr kơ dră chĕp kơ̆l, kon pơ lei 2 teh đak ư̆h kơ đei pơ dơ̆h hơ tŏk tơ iung păng tơ gŭm lơ̆m hloh 60 sơ năm âu ki. Mă loi ‘noh lơ̆m khei ‘năr tơ jê̆ âu, Anih tơm, anih jang 2 teh đak hlôi hơ drin hơ met ‘lơ̆ng rim tơ drong mơ mat tat yua đơ̆ng jĭ hơ buh Covid-19 păng ư̆h kơ đei pơ dơh hơ met ming, hơ tŏk tơ iung jang hơ dai lơ̆m rim tơ drong jang.

Thuem: Tơ blơ̆