VOV4.Bahnar - Kơ sơ̆ ‘năr 3/8, Thủ tướng teh đak Phạm Minh Chính hlôi sơng Kơ dră tang măt Liên bang Nga tơ̆ Việt Nam Bezdetko truh rôp ti pơ ma dơ nuh. Thủ tướng pơ ma hơ dăh Việt Nam ling lang chih răk păng băt bơ nê kơ dôm tơ drong tơ gŭm kăp gĭt mă Liên Xô hơ drol sơ̆ păng Liên bang Nga hrei ‘nâu hlôi ‘măn ăn kơ Việt Nam lơ̆m tơ drong tơ blăh iŏk rơ ngei hơ drĕch hơ drŭng păng hơ tŏk tơ iung teh đak. Thủ tướng chhôk hơ iă lăng ƀôh tơ drong pơ vei đơ̆ng 2 teh đak hơ nơ̆ng hơ tŏk tơ iung ‘lơ̆ng, tơ ƀơ̆p pơ ma dơ nuh rim kơ dră, đei hloi kơ dră kơ pal đei pơ vei hơ nơ̆ng ‘moi kiơ̆ pơ ma điên thoăi păng trực tuyến.

Thủ tướng Phạm Minh Chính sơng kơ dră tang măt Nga Bezdetko

Kơ dră tang măt Nga Bezdetko pơ ma hơ dăh Việt Nam ling lang jing teh đak jang hơ dai ‘lơ̆ng kơ Liên bang Nga tơ̆ tơ ring Châu Á – Thái Bình Dương; drơ̆ng 1 nơ̆r ‘lơ̆ng hăm rim trong hơ len lăng, trong vă jang păng rim trong jang pơ trŭt tơ drong pơ vei 2 teh đak mă Thủ tướng teh đak Phạm Minh Chính tơ roi păng pơ ma hơ dăh gô hơ drin vang tơ gop vă hơ met ming păng vei kơ jăp hloh dơ̆ng tơ drong pơ vei đơ̆ng Việt Nam păng Nga.

 Thuem: Tơ blơ̆